ताप्लेजुङमा एक प्रहरी टोलीमाथि गम्भीर आरोप लागेको छ ।  भाद्र २१ गते लाखेजात्रा समापनको राति  कोशी प्रदेश सभा सदस्य खगेनसिं हाङ्गामको निवास नजिक मादक पदार्थ सेवन गरेका प्रहरी टोलीले उपद्रो मच्चाएको आरोप लागेको हो । 

खगेनसिं हाङ्गामको निवासबाट करिव २५ मिटर टाढा संचालन भएको मिनिमेलामा मादक पदार्थ सेवन गरेका प्रहरीहरुले  कांग्रेसका नेता तथा सर्वसाधारण व्यक्तिलाई समेत कुटपिट र हातपात गर्नुका साथै दुव्र्यवहार गरेको नेपाली कांग्रेस ताप्लेजुङ र स्थानीयवासी समेतलाई उदृत गर्दै कांग्रेस पार्टी कार्यालयले शुक्रबार जारी गरेको विज्ञप्तिमा उल्लेख छ । 

 यस घटनाको पार्टीले घोर निन्दा र भत्सर्ना गर्ने पार्टी कार्यालयका मुख्यसचिव कृष प्रसाद पौडेलले जारी गरेको विज्ञप्तिमा उल्लेख छ । 

‘मेलामा सहभागी भएका पेमा लामा तामाङ सुकेटार घुमफिर गरी फर्कने क्रममा यो घटनाका बारेमा आवाज उठाउँदा प्रहरीले उहाँमाथि मुक्का प्रहार गर्नुका साथै सेटले समेत हिर्काएका छन् । उहाँको आँखामा गम्भीर चोट लागेको छ र चस्मा फुटेको छ’, कांग्रेसको विज्ञप्तिमा भनिएको छ । 

घटनाका बारेमा बुझ्न खोज्दा कोशी प्रदेश सभाका सदस्य हाङ्गाममाथि समेत वर्दी र सादा पोशाकमा रहेका प्रहरीले गालीगलौज गर्दै दुव्र्यवहार गर्नुका साथै उनको निवासमा ढुंगामुडा गरेको कांग्रेसले जनाएको छ । 

‘जनताको सेवक जनप्रतिनिधिलाई सुरक्षा दिनको अलावा निवासमै गएर गुण्डागर्दी शैलिमा आक्रमण गर्नु गराउनु प्रहरी प्रशासनको नियोजित र गैर जिम्मेवार कार्य हो’, कांग्रेसले भनेको छ, ‘मेलामा सर्वसाधारण व्यक्तिलाई सुरक्षा दिनु प्रहरी प्रशासनको कर्तव्य हो । यसबाट विमुख भएर प्रहरी प्रशासनले देखाएको अमर्यादित क्रियाकलाप खेदजनक छ ।’

 उक्त घटनाको छानविन गरी संलग्न दोषी प्रहरीलाई निलम्वन गर्नुका साथै कडा भन्दा कडा कार्वाही गर्न कांग्रेसले सरकारसँग जोडदार माग गरेको छ ।