चारवटा प्रदेशस्थित खेलकुद परिषद्का सदस्य सचिवहरूले राष्ट्रिय खेलकुद परिषद्का सदस्य सचिव टंकलाल घिसिङलाई भेटेर भोलि हुने नेपाल ब्याडमिन्टन संघको साधारण सभा स्थगित गराउन आग्रह गरेका छन् ।

कोशी प्रदेशका सदस्य सचिव हंशराज वाग्ले, गण्डकी प्रदेशका सदस्य सचिव श्रीधर शर्मा, लुम्बिनी प्रदेशका सदस्य सचिव जयप्रकाश भट्टराई र सुदूरपश्चिम प्रदेशका सदस्य सचिव दीपक सिंहले बुधवार घिसिङलाई भेटेर गैरकानूनी ढं‌गले हुन लागेको साधारण सभालाई आफूहरूले मान्यता दिन नसक्ने जानकारी गराएका हुन् ।

'विधि, ऐन, कानूनविपरीत संघका अध्यक्ष रामजीबहादुर श्रेष्ठले चुनावी साधारण सभा गर्न लागेका छन् । कुनै पनि प्रदेशले प्रदेश संघ गठन भएको मान्यता दिएका छैनन्, त्यसैले राखेपले त्यसलाई मान्यता दिनुहुँदैन भनेर हामी चारैजनाले सदस्य सचिव घिसिङलाई भन्यौं,' गण्डकी प्रदेश खेलकुद परिषद्का सदस्य सचिव श्रीधर शर्माले लोकान्तरसँग भने ।

घिसिङले 'कम्तीमा ४ (बहुमत) प्रदेश सदस्य सचिवले मान्यता दिएको चिठी नल्याएसम्म निर्वाचन प्रतिनिधि पठाउन्नँ' भन्ने जवाफ दिएको शर्माले लोकान्तरलाई जानकारी दिए ।

'जवाफमा उहाँ (घिसिङ) ले मैले ब्याडमिन्टन संघका अध्यक्षलाई कम्तीमा ४ वटा प्रदेशका सदस्य सचिवको चिठी ल्याएपछि मात्र निर्वाचन प्रतिनिधि पठाउँछौं भनेर भनिसकेको छु भन्नुभयो,' शर्माले भने ।

प्रदेश खेलकुद परिषद् बागमतीका सदस्य सचिव सूर्य भण्डारीको पनि ऐक्यबद्धता रहेको घिसिङलाई भेटेका अर्का एक सदस्य सचिवले लोकान्तरलाई जानकारी दिए ।

‘सूर्य भण्डारी उपस्थित हुन नसके पनि ऐक्यबद्धता जनाउनु भएको छ, ब्याटमिन्टन संघको अबैध साधारणसभा रोक्नुपर्छ भनेर भन्नु भएको छ,’ ती सदस्य सचिवले लोकान्तरसँग भने, ‘टंकलाल घिसिङलाई फोन गरेर आफ्नो राय राख्नुभएको हामीले थाहा पाएका छौं ।’

विधि प्रक्रिया नमिलेका कारण भोलि हुने भनिएको साधारण सभाको मिति सार्न आग्रह गरेका प्रदेश सदस्य सचिवहरूले जबरजस्ती साधारण सभा गरिए मान्यता नदिने जानकारी गराएका थिए ।

प्रदेशको मान्यता नमिल्दासम्म साधारण सभालाई राखेपले पनि मान्यता नदिने भनेर घिसिङले आश्वस्त पारेको उनको भनाइ छ ।

पढ्नुहोस्, यो पनि :

कानून मिचेर साधारण सभा गर्दै ब्याडमिन्टन संघ, प्रदेश खेलकुद परिषद्ले भने– अवैध हो, मान्यता दिन्नौं