​​​​नेपाली कांग्रेसको १४ औं महाधिवेशनपछि कार्यकाल आधा हुँदै गर्दा कतिपयले १५ औं महाधिवेशनको सम्भावित समीकरणबारे चर्चा गरिरहेका छन् । १४ औं महाधिवेशनमा महामन्त्रीमा जितेका गगन थापा र विश्वप्रकाश शर्मा अब कुन पदमा चुनाव लड्लान् ?

महाधिवेशन आउन अझै साढे दुई वर्ष हाराहारी बाँकी छ ।

तर कांग्रेस केन्द्रीय समितिको बैठक चलिरहेका बेला एउटा रमाइलो संवाद भएको छ ।

सभापति शेरबहादुर देउवाले विश्वप्रकाश शर्मालाई उपसभापति भनेपछि बैठकमा केहीबेर हाँसी मजाको स्थिति देखियो ।

केन्द्रीय समितिको बैठक चलिरहेका बेला सदस्यहरूले शिक्षकहरूका माग सम्बोधन गर्न अग्रसरता लिनुपर्ने भन्दै दबाब दिएका थिए ।

यसैले बैठककै बीचमा शिक्षकको माग सम्बोधनका लागि कांग्रेसले विशेष निर्णय गर्दा देउवाले महामन्त्री शर्मालाई उपसभापति भनेका हुन् ।

‘अब एउटा प्रस्ताव हाम्रो महा.. उपसभापति सरी महामन्त्री जी, मैंले त पूर्णबहादुर भन्ठानेछु’ देउवाले यति भनिनसक्दै, ‘महामन्त्री शर्माले देउवाको झुक्किएको विषयमा भने– उपसभापतिको विषयमा महासमिति बैठकपछि त्यो छलफल गर्नुपर्छ ।’

त्यसपछि पनि देउवाले पूर्णबहादुर भनेर झुक्किएको बताएका थिए । देउवा झुक्किएर महामन्त्री शर्मालाई उपसभापति भनेपछि केहीबेर हलमा हाँसो छाएको थियो । 

१३ औं महाधिवेशनपछि देउवाले नै शर्मालाई पार्टीको प्रवक्ता बनाएका थिए । तर १४ औं महाधिवेशनमा महामन्त्रीको उम्मेदवार नबनाएपछि शर्मा प्रकाशमान सिंहको तर्फबाट उठेर सोही पदमा निर्वाचित भएका थिए ।

दुवै उपसभापति शिक्षकहरूको वार्तामा गएपछि शर्माले शिक्षकबारे कांग्रेसको धारणा सार्वजनिक गरेका थिए । 

बैठक नसकिँदै कांग्रेसले आन्दोलनरत शिक्षकहरूका जायज मागलाई पूरा गर्न संसदमा भूमिका खेल्ने भन्दै विद्यालयमा पठनपाठनको प्रक्रिया शुरू गर्न माग गरेको थियो ।

‘संसदमा दर्ता गरेको शिक्षा विधेयक दर्ता भएको छ । शिक्षकका मागका विषयमा वार्ताबाट समाधान निकाल्न सकिन्छ । कांग्रेस सरकार र शिक्षकबीच भएको वार्तालाई स्वागत गर्छौं’ बैठकबाट गरेको निर्णयबारे जानकारी गराउँदै महामन्त्री विश्वप्रकाश शर्माले भने, ‘विद्यालय शिक्षाको अवस्था र शिक्षकका हक हितका विषयलाई समेटेर विधेयकलाई ऐन बनाउँदा परिमार्जन गर्न सकिने विषय छन् । संसदीय प्रक्रियाबाट परिमार्जन गर्न सकिन्छ । सार्थक वार्ताबाट यथा शिघ्र सहमतिमा पुग्नुपर्छ । शिक्षकले पनि छिटो छिटो पठनपाठन गर्ने वातावरण बनाउनुपर्छ भन्नेमा माग कांगेस गर्दछ ।’ 

कांग्रेस केन्द्रीय समितिको बैठक आइतवार पनि बस्नेछ ।