नेकपा (एमाले)का अध्यक्ष केपी शर्मा ओलीले इन्गेजमेन्ट (टिकाटालो) गरेका नेपाली टिकटकर आयुष सिंह ठकुरी र पाकिस्तानी युवती अलिजेह जमालीलाई बधाई दिएका छन् । उनले शनिवार सामाजिक सञ्जालमार्फत बधाई दिएका हुन् । 

बधाई दिँदै ओलीले मायाले जाति, धर्मको र देशको सीमाको पर्खाल पनि नाघेर उचाइ लिने बताएका छन् ।

‘टिकटकर आयुष सिंह ठकुरी र पाकिस्तानी टिकटकर अलिजेह जमालीले दूबईमा आफ्ना आमाबाबुलाई साक्षी राखेर आ–आफ्नो संस्कृतिअनुसार इन्गेजमेन्ट गरे,’ उनले फेसबूकमा लेखेका छन्, ‘मायाले जाति, धर्म र देशको सीमाको पर्खाल पनि नाघेर उचाइ लिन्छ । यसले जाति, धर्म, सम्प्रदायमा भिन्नता होइन समानता खोज्न सिकाउँछ । उनीहरूलाई बधाई छ ।’

चर्चित नेपाली टिकटकर आयुष ठकुरीले शुक्रवार दूबईमा प्रेमिका तथा पाकिस्तानी टिकटकर अलिजेहसँग इन्गेजमेन्ट गरेका थिए । 

आयुष र अलिजेहले आ–आफ्ना टिकटक एकाउन्टबाट इन्गेजमेन्टबारे जानकारी दिएका हुन् ।

एकअर्काले औंठी लगाइदिएको दृश्य भिडियोमा देख्न सकिन्छ । उक्त समारोहमा अलिजेहका आफन्त पनि समारोहमा उपस्थित भएर नाचगान गरिरहेको देख्न सकिन्छ ।

नेपालका आयुष र पाकिस्तानकी अलिजेह टिकटक लाइभबाट जोडिए प्रेम सम्बन्धहुँदै इन्गेजमेन्टसम्म पुगेका हुन् । पछिल्लो समय यी दुवै दूबईमा बस्दै आएका थिए । 

आयुष हिन्दू हुन् भने अलिजेह मुस्लिम । यी दुई प्रेममा परेको थाहा पाएपछि पाकिस्तानमा कतिपयले धर्मको सवाल उठाउँदै आयुषले धर्म परिवर्तन गरेर मात्र मुस्लिम युवतीलाई विहे गर्न पाउने प्रतिक्रिया दिएका थिए ।