रिगल भनिने योगराज ढकाललाई आममाफी दिने राष्ट्रपतिको निर्णयविरुद्ध परेको रिटमाथि सर्वोच्च अदालतमा सुनुवाइ सकिएको छ ।

न्यायाधीशहरू ईश्वरप्रसाद खतिवडा, सपना प्रधान मल्ल र डा. कुमार चुडालको पूर्ण इजलासमा रिट निवेदक र विपक्षी दुवैको बहस तथा निवेदकको जवाफ बहस समेत सकिएको हो ।

बहस सकिए पनि न्यायाधीशहरूको भोलि दिउँसो ३ बजे निर्णय सुनाउने भन्दै उठेको रिट निवेदकका तर्फबाट बहस गरेका अधिवक्ता कीर्तिनाथ शर्मा पौडेलले बताए ।

उनकाअनुसार भोलि ३ बजेपछि निर्णय सुनाउने भनेर दुवै पक्षका कानून व्यवसायीलाई इजलासले बोलाएको छ ।

नेपालगञ्जका चेतन मानन्धरको हत्यामा तीनै तहका अदालतले रिगललाई जन्मकैदको सजाय गरेको भए पनि संविधान दिवसको अवसर पारेर सरकारको सिफारिसमा राष्ट्रपति रामचन्द्र पौडेलले आममाफी दिएका थिए ।

सोही निर्णय बदर गरी रिगललाई पुनः जेल पठाउनुपर्ने माग गर्दै चेतनकी पत्नी भारतीले रिट दिएकी हुन् ।

यसअघि प्रारम्भिक सुनुवाइका क्रममा असोज १८ गते न्यायाधीश डा. मनोजकुमार शर्माको इजलासले विभिन्न प्रश्न उठाउँदै मिति र समय समेत तोकेर विपक्षीसँग लिखित जवाफ मागेको थियो ।

रिट निवेदनको टुंगो नलागेसम्म निवेदक भारती शेर्पा र उनको परिवारका सदस्यलाई सुरक्षा प्रदान गर्न, महान्यायाधिवक्ता नै बहसमा उपस्थित हुन पनि उक्त इजलासले आदेश गरेको थियो ।