नेपाल–भारत महिलामैत्री समाजको पहलमा ४४ जना नेपाली विद्यार्थीले भारतमा पूर्ण छात्रवृत्तिमा उच्च शिक्षा अध्ययन गर्न पाउने भएका छन् ।

समाजले शुक्रवार राजधानी काठमाडौंमा विशेष कार्यक्रम गरी भारतका २ शैक्षिक संस्थासँग छात्रवृत्तिसम्बन्धी सम्झौता भएको जानकारी गराएको हो ।

गान्धी एजुकेसन ट्रस्ट कटिहार (बिहार) र बुद्ध इन्स्टिच्युट अफ टेक्नोलोजी (गया)मा २२–२२ गरी कुल ४४ जना विद्यार्थीलाई पूर्ण छात्रवृत्ति उपलब्ध गराउने गरी सम्झौता भएको नेपाल–भारत महिला मैत्री समाजकी अध्यक्ष एवं नेपाली कांग्रेसकी सांसद चन्दा चौधरीले बताइन् ।

आर्थिक समस्याका कारण उच्च शिक्षा अध्ययन गर्न नसकेका विद्यार्थीहरूलाई लक्षित गरेर छात्रवृत्ति कार्यक्रम शुरूआत गर्न लागिएको उनको भनाइ छ ।

‘सबैलाई गर्न त सक्दैनौं, तर केही व्यक्तिलाई भए पनि राहत हुन्छ कि भन्ने सोच बनाएर म र मेरो संस्थाको पहलमा छात्रवृत्ति कार्यक्रम शुरूआत गरेका छौं,’ सांसद चौधरीले भनिन् ।

गान्धी एजुकेसन ट्रस्टले डिप्लोमा इन नर्सिङ कोर्स अध्ययन गर्न ११ र बीएस्सी इन नर्सिङ कोर्स अध्ययन गर्न ११ गरी २२ जनालाई पूर्ण छात्रवृत्ति प्रदान गर्नेछ ।

त्यसैगरी बुद्ध इन्स्टिच्युट अफ टेक्नोलोजीले डिप्लोमा इन इन्जिनियरिङमा ११ र ब्याच्लर इन टेक्नोलोजी ( बी.टेक)मा ११ जनालाई पूर्ण छात्रवृत्ति उपलब्ध गराउनेछ ।

छात्रवृत्ति २०२४ को शैक्षिक क्यालेन्डर बाट शुरू हुने समाजले जनाएको छ ।

ती दुवै संस्थाले थप २–२ जना बालबालिकालाई नेपालमै अध्ययन गर्न सम्पूर्ण खर्च उपलब्ध गराउने सम्झौता पनि भएको सांसद चौधरीले बताइन् ।

उनका अनुसार कक्षा एक कक्षादेखिकै ४ जना बालबालिकाले अध्ययनको खर्च पाउनेछन् । 

साना बालबालिकाको हकमा होस्टलमा राखेर पढाउनुपर्ने हो भने होस्टल तथा पढाइको सम्पूर्ण खर्च तथा आमाबाबुसँगै बसेर पढ्ने हो भने पढाइमा लाग्ने सबै खर्च ती संस्थाले ब्यहोर्ने उनको भनाइ छ ।

कार्यक्रममा गान्धी एजुकेसन ट्रस्टका अध्यक्ष डा. राजीवकुमार जैसवालले नेपाल–भारत सम्बन्धलाई अझै प्रगाढ बनाउनका लागि छात्रवृत्तिको सम्झौता भएको बताए ।

नेपाल–भारत महिलामैत्री समाजकी अध्यक्ष चन्दा चौधरीको पहलमा आफूहरूले छात्रवृत्ति उपलब्ध गराउने गरी सम्झौता गरेको भन्दै उनले समाजले छनोट गरेर पठाएका विद्यार्थीले छात्रवृत्ति पाउने बताए ।

यस किसिमको पहलकदमीका लागि अध्यक्ष चौधरीको प्रशंसा गर्दै उनले भारतमा अन्य शैक्षिक संस्थाहरूलाई पनि छात्रवृत्तिका लागि आग्रह गर्ने बताए ।

गरिब तथा जेहेन्दार विद्यार्थीको उच्च शिक्षा अध्ययनको सपना आर्थिक अभावले अलपत्र नपरोस् भनेर यस किसिमको कार्यक्रम शुरू गरिएको समाजले विज्ञप्तिमार्फत जनाएको छ ।

‘जेहेन्दार विद्यार्थीहरूको उच्च शिक्षा अध्ययन गर्ने सपना आर्थिक अभावले बन्द नहोस् भन्ने उद्देश्यका लागि भारतका प्रतिष्ठित शैक्षिक संस्थाहरूसँग छात्रवृत्तिका लागि पहल गरेका हौं,’ समाजले जारी गरेको विज्ञप्तिमा भनिएको छ, ‘नेपाल–भारत महिला मैत्री समाजले भविष्यमा पनि अन्तर्राष्ट्रिय शैक्षिक संस्थाहरूसँग नेपाली विद्यार्थीलाई पूर्ण छात्रवृत्तिका लागि पहल गर्नेछ ।’

हेरौं भिडियोः