कोशी प्रदेश सभा तीन महिनादेखि सभामुखविहीन छ । तत्कालीन सभामुख बाबुराम गौतमले राजीनामा दिएपछि प्रदेश सभामुखविहीन बनेको हो । उपसभामुख सिर्जना दलनुवारले सभा सञ्चालनको जिम्मेवारी सम्हाल्दै आएकी छन् ।

२०७९ पौष २८ गते निर्विरोध निर्वाचित भएका बाबुराम गौतमले सरकारलाई बहुमत पुर्‍याइदिन गत साउन १६ गते पदबाट राजीनामा दिएका थिए । कांग्रेस संसदीय दलका नेता उद्वव थापालाई बहुमत पुर्‍याइदिन उनले राजीनामा राजीनामा दिएका थिए । 

तीन महिनासम्म दिँदा पनि कसैले नलिएको सभामुख पद अहिले भने सबैको रोजाइमा पर्न थालेको छ । केही महिना अगाडिसम्म एक–अर्कालाई छोड्दै आएको सभामुख पद अहिले दलहरूलाई प्रतिष्ठाको विषय बनेको छ ।

सत्ता गठबन्धनले पटकपटक सभामुख पद लिइदिन गरेको अनुरोधलाई लत्याउँदै आएको राष्ट्रिय प्रजातन्त्र पार्टी र सकेसम्म सत्ता गठबन्धन दलहरूमै सभामुख पद सुम्पिने कोसिस गर्दै आएको नेकपा एमाले अहिले सभामुख पद हत्याउन प्रयत्नशील छन् । विपक्षी बेञ्चमा बस्दै आएका दुई दल भने सभामुख पद हत्याउन लबिइङ गरिरहेका छन् । 

प्रदेश सरकारले विश्वासको मत पाए पनि संख्याका कारण जुनसुकै बेला संकट आउने ठानेर सत्ता गठबन्धनमा आवद्ध दलहरू भने सभामुख आफूसँग राख्ने पक्षमा छैनन् ।

लामो समयपछि गत सोमबार बसेको प्रदेश सभा बैठकमा सभामुख चयनको विषय उठेको थियो । सभामुख चयनको विषय सदनमा उठेपछि उपसभामुख दनुवारले पनि चाडपछि दलहरूबीच सहमति बनाएर सभामुख चयनको प्रक्रिया अगाडि बढाउने संकेत गरेकी छन् । संसदीय पत्रकार मञ्चमा आवद्ध पत्रकारहरूसँगको भेटघाटका क्रममा उनले सहमतिबाट सभामुख चयनको प्रक्रिया अगाडि बढ्ने बताइन् । 

सभामुख चयनको विषयले सदनमा प्रवेश पाएसँगै नेकपा एमालेले उक्त पदमा दाबी गर्ने संकेत गरेको छ । एमाले संसदीय दलका प्रमुख सचेतक रेवतिरमण भण्डारीले सभामुख एमालेले पाउनु पर्ने प्रतिक्रिया दिए । उनले उपसभामुख पद एमालेले अरु कसैका लागि छोड्न नसक्ने भन्दै सभामुख पद आफूहरूले नै पाउनु पर्ने बताए । 

सभामुख बन्न नेकपा एमालेका सांसद चिन्तन पाठकले आन्तरिक तथा बाह्य लबिइङ सुरु गरिसकेका छन् । उनले आफू निकटका सांसद, नेता तथा अन्य दलका केही नेताहरूसँग सभामुखका लागि सहयोग गर्न आग्रह गरिसकेको स्रोतले बताएको छ । 

स्रोतका अनुसार बहावाला उपसभामुख सिर्जना दनुवारले पनि सभामुखमा लभिइङ गर्न थालेकी छिन् । उनले प्रतिनिधि सभाकी उपसभामुख डा. शिवमाया तुम्बाहफेमार्फत् पार्टीमा दबाब बढाएकी छन् । 

तर, सभामुख एमालेलाई दिन नहुने मत सत्ता गठबन्धनमा छ । एमालेले यसअघि संसदमा देखाएको व्यवहारबाट उनीहरू सशंकित छन् । स्पष्ट बहुमतको सरकार गठन भएको बेला दलीय प्रभावमा पारेर उपसभामुखसहित ज्येष्ठ सदस्यहरूलाई अनुपस्थित गराएर सरकार ढालेको एमालेलाई सभामुख दिन नहुने उनीहरूको तर्क छ । 
अर्कोतर्फ संविधानको धारा १६८ को उपधारा ५ बमोजिम सरकार बनाउने तयारीका क्रममा नेकपा माओवादी केन्द्र संसदीय दलका नेता इन्द्रबहादुर आङ्बोलाई मुख्यमन्त्रीको उम्मेदवार बनाउने निर्णय गर्नुअघि प्रधानमन्त्री प्रचण्डले राप्रपा अध्यक्ष राजेन्द्र लिङ्देनसँग छलफल गरी राप्रपालाई सभामुख पद दिने सहमति गरिसकेको गठबन्धनकै नेताहरूको दाबी छ ।  

शीर्ष नेताहरूबीचको सहमति जानकारीमा रहेको भन्दै राप्रपा नेताहरू सभामुख पद आफूहरूले पाउनु पर्ने दाबी गरिरहेका छन् । राप्रपा सांसद अम्बरबहादुर विष्टले पनि सभामुख पद लिन आफूहरू सकारात्मक भएको बताए । सरकारका विनाविभागीय मन्त्री शमशेर राईले पनि राप्रपाबाट सभामुख बन्ने सम्भावना प्रबल रहेको बताए । 

संविधानको धारा १८२ मा प्रदेश सभाको सभामुख र उप–सभामुखको चयन प्रक्रिया उल्लेख छ । उक्त धाराको उपधारा (३) मा सभामुख वा उप–सभामुखको पद रिक्त भएमा प्रदेश सभाका सदस्यहरूले आफूमध्येबाट निर्वाचन गरी पदपूर्ति गर्नुपर्ने विषय स्पष्ट छ । तर, सभामुख र उपसभामुख एउटै पार्टीको हुन नपाउने व्यवस्था छ । त्यसो हुँदा एमालेले सभामुख लिन पाउँदैन । तर, एमाले उप–सभामुखलाई राजीनामा गराएर भए पनि सभामुख लिने योजनामा देखिन्छ । 

कोशी प्रदेश सभामा उप–सभामुखसहित एमालेका ४०, कांग्रेसका २९, माओवादी केन्द्रका १३, राष्ट्रिय प्रजातन्त्र पार्टीका ६, नेकपा (एकीकृत समाजवादी) का चार र जनता समाजवादी पार्टीबाट एक जना सांसद छन् । प्रदेश सभामा बहुमतका लागि ४७ जना सांसदको समर्थन आवश्यक पर्छ ।