पूर्वराजा ज्ञानेन्द्र शाहले राष्ट्रिय प्रजातन्त्र पार्टी (राप्रपा)का नेताहरूसँग सामुहिक भेट गरेका छन् । पूर्वराजाले भैरहवामा बुधवार आफ्नो पार्टीका नेतासँग सामुहिक भेट गरेको जानकारी राप्रपाका वरिष्ठ उपाध्यक्ष रवीन्द्र मिश्रले दिएका छन् । 

नागरिक अभिनन्दनका लागि भैरहवामा पुगेका पूर्वराजा ज्ञानेन्द्रसँग आफूहरूले भेट गरेको जानकारी उनले सामाजिक सञ्जालमार्फत गराएका हुन् । 

भेटका क्रममा पूर्वराजा ज्ञानेन्द्रले सबैलाई आफूले ऐतिहासिक संस्थाको प्रतिनिधित्व गर्ने गरेको र सबैलाई एकताको सूत्रमा बाध्न चाहेको बताएको मिश्रले उल्लेख गरेका छन् । 

यता अध्यक्ष लिङ्देनले पनि पूर्वराजासँग भेट भएको भन्दै सामाजिक सञ्जालमा तस्वीर राखेका छन् । 

ज्ञानेन्द्रसँगको भेटमा राप्रपा अध्यक्ष राजेन्द्र लिङ्देन, वरिष्ठ उपाध्यक्ष रवीन्द्र मिश्र, बुद्धिमान तामाङ, धवलशमशेर राणा र दीपकबहादुर सिंह रसहभागी थिए । 

भेटमा सहभागी भएका नेता राणाले देशको परिस्थितिलाई लिएर पूर्वराजाले चिन्ता गरेको जानकारी दिए । 

‘हामीले उहाँ (ज्ञानेन्द्र)सँग डेढ घण्टा जति छलफल गर्यौं । देशको परिस्थिति र समसामयिक विषयमा कुराकानी भयो । देशमा कस्तो परिस्थिति छ भन्नेबारे उहाँको चासो थियो । हामीले पछिल्लो अवस्थाबारे जानकारी गरायौं,’ उनले भने, ‘देशको वर्तमान परिस्थितिप्रति उहाँले चिन्ता जनाउनुभयो । हामीले राजाको भ्रमणलाई सफल बनाउन कार्यक्रम गर्छौ भन्यौं ।’ 

भेटका क्रममा पूर्वराजाले ज्ञानेन्द्रले नाति हृदयेन्द्रलाई अगाडि सार्ने विषयमा केही प्रतिक्रिया नदिएको उनले बताए । 

‘पछिल्लो समय पूर्वराजाले नातिलाई प्राथमिकता दिएर कार्यक्रममा पनि लिएर हिँड्ने गरेका छन् । नातिलाई अगाडि सार्नेबारे उहाँले केही बताउनुभयो भन्ने प्रश्नमा राणाले भने, ‘हृदयेन्द्रलाई अगाडि सार्नेबारे उहाँले केही कुरा गर्नुभएन ।’ 

यसअघि पनि राप्रपाका नेताहरूले पूर्वराजासँग सामुहिक रुपमा भेट गरेका थिए ।