सरकारले २७ जना सहसचिवहरूको सरुवा गरेको छ ।

संघीय मामिला तथा सामान्य प्रशासनमन्त्री अनितादेवी साहका स्वकीय सचिव कमल चुडालका अनुसार बुधवार बसेको मन्त्रिपरिषद् बैठकबाट २७ जना सहसचिवहरूको सरुवा भएको हो ।

‘आज बसेको मन्त्रिपरिषद् बैठकबाट २७ जना सहसचिवहरूको सरुवा गरिने निर्णय भएको हो । प्रमाणीकरण भएर आइसकेको छैन’, चुडालले लोकान्तरसँग भने, ‘अब भोलि प्रमाणीकरण भएर आउला ।’

विभिन्न प्रदेशमा सहसचिवहरूलाई पठाइएको उनले बताए । ‘यो सरुवा प्रदेश स्तरीय नै भएको हो, सबै प्रदेशमा विभिन्न मन्त्रालयमा रिक्त रहेका सचिव पदको लागि सरुवा गरिएको हो’, उनले लोकान्तरसँग भने ।

मन्त्रालयबाट पठाइएको सहसचिवको सरुवा सूची प्रधानमन्त्री तथा मन्त्रिपरिषद्को कार्यालयमा अड्किएको थियो ।

मन्त्रालयले गत पुष २३ गते ३२ जना सहसचिवहरूको सरुवा हुनुपर्ने निर्णय प्रधानमन्त्री तथा मन्त्रिपरिषद् कार्यालयमा पठाएको थियो ।