जनमतमा खस्किँदो माओवादी प्राविधिकरूपमा माथिल्लो सदनको पहिलो दल, एमाले झर्‍यो तेस्रोमा

प्रतिनिधि सभा ३२ सीटसहित तेस्रो स्थानमा रहेको नेकपा (माओवादी केन्द्र) राष्ट्रिय सभामा भने पहिलो दल बन्ने भएको छ ।

कुनै समय ठूलो अन्तरसहित पहिलो स्थानमा रहेको एमाले निरन्तर खुम्चिँदै तेस्रोमा झर्ने देखिएको छ । एमालेको स्थान अब आफैंबाट टुक्रिएर बनेको नेकपा एकीकृत समाजवादीको हाराहारीमा हुनेछ ।

फागुन २० पछि नवनिर्वाचित सांसदहरूले पदभार ग्रहण गर्दा राष्ट्रिय सभामा एमालेका १० र एकीकृत समाजवादीका ८ सदस्य हुनेछन् । 

राष्ट्रिय सभाका १९ सदस्यका चयनका लागि बिहीबार भएको निर्वाचनमा आफ्नो भागबन्डामा परेका ६ मध्ये ५ उम्मेदवारलाई विजयी गराएर माओवादी पहिलो दल बन्ने भएको हो ।

हालसम्म राष्ट्रिय सभामा १८ सांसदसहित एमाले पहिलो स्थानमा छ । 

फागुन २० मा आफ्ना ९ सदस्यको पदावधि सकिँदा एमालेले जम्मा १ सीट मात्र थप्ने पक्का भएको छ ।

चुनाव भएका १९ पदमा सत्ता गठबन्धनबाट कांग्रेसले १०, माओवादीले ५, नेकपा एकीकृत समाजवादीले २ तथा जनता समाजवादी पार्टी र एमालेले १/१ सीट जितेका छन् । 

फागुन २० गते एकतिहाइ सदस्यको पदावधि सकिने भएपछि १९ सदस्यका लागि बिहीबार निर्वाचन भएको हो । 

२०६४ मा अप्रत्यासित मत ल्याएयता जनमतमा निरन्तर खस्किँदो माओवादीका ३ सांसद बिदा हुँदा ५ थपिने देखिन्छ । कोशीमा चन्दा कार्कीले अप्रत्याशित हार व्यहोरेपछि माओवादीलाई एक सांसद घाटा लागेको छ ।

४ सांसदको कार्यकाल सकिँदै गरेकोमा कांग्रेसले १० जना थप्न सफल भएको छ । बाँकी रहेका ६ सहित कांग्रेस सांसदको कुल संख्या १६ पुग्नेछ ।

नेकपा एकीकृत समाजवादीका ८ सदस्य थिए । दुई सदस्यको पदावधि सकिएर २ जना नै निर्वाचित हुँदा उसको हिसाब फरक पर्ने छैन ।

जसपाका ३ सदस्यमध्ये १ जना प्रमिलाकुमारीको पदावधि सकिएर एकजना पुनः निर्वाचित भएका छन् । 

यसबाहेक राष्ट्रिय जनमोर्चा १, लोसपा १ गरी अन्य २ सांसद छन् । 

मनोनीत ३ नारायणप्रसाद दाहाल, वामदेव गौतम र विमल राई पौडेलमध्ये राईको पदावधि सकिएपछि एक पद मनोनीत हुनुपर्नेछ । 

यसरी माओवादीका १७, कांग्रेसका १६, एमालेका १०, समाजवादीका ८, जसपाका ३, मनोनीत २, राष्ट्रिय जनमोर्चा र लोसपाका १-१ गरी २ समेत ५८ सदस्य राष्ट्रिय सभामा हुनेछन् ।

थप एक जना महिला सदस्य मनोनीत भएपछि कुल सदस्य संख्या ५९ कायम हुनेछ ।

कुन प्रदेशबाट को निर्वाचित भए ? 

बिहीबार सात प्रदेशमा १९ सीटका लागि निर्वाचन भएको थियो, जसमा बागमतीबाट सबैभन्दा बढी ४, गण्डकी, लुम्बिनी र सुदूरपश्चिममा ३/३ गरी ९, कोशी, मधेश र कर्णाली २/२ गरी ६ समेत १९ सीटमा निर्वाचन भएको हो ।

बिहीबारको निर्वाचनमा कांग्रेसले १०, माओवादीले ५, नेकपा एकीकृत समाजवादीले २ तथा एमाले र जसपाले १/१ एक सीट जितेका छन् ।  

कोशीमा कांग्रेसका कृष्णप्रसाद सिटौला विजयी हुँदा माओवादीकी चम्पादेवी कार्कीलाई पराजित गरी एमालेकी रुक्मिणी कोइराला निर्वाचित भइन् ।  

बागमतीमा जीतजंग बस्नेत र विष्णुदेवी पुडासैनी कांग्रेसबाट निर्वाचित भएका छन् ।

श्रीकृष्णप्रसाद अधिकारी माओवादी केन्द्र र घनश्याम रिजाल नेकपा एकीकृत समाजवादीबाट निर्वाचित भएका छन् । 

मधेश प्रदेशबाट कांग्रेसका आनन्दप्रसाद ढुंगाना र जनता समाजवादी पार्टीकी पूजा चौधरी विजयी भएका छन् । 

गण्डकीबाट ३ सदस्यमध्ये किरणबाबु श्रेष्ठ र पदमबहादुर परियार कांग्रेसबाट तथा माओवादीबाट मनरूपा शर्मा निर्वाचित भए । 

लुम्बिनीमा विष्णुकुमारी सापकोटा कांग्रेसबाट निर्वाचित भइन् भने माओवादीका झक्कुप्रसाद सुवेदी निर्वाचित भए । 

कर्णाली प्रदेशमा कांग्रेसबाट कृष्णबहादुर रोकाया, माओवादीका विष्णुबहादुर विश्वकर्मा र नेकपा एकीकृत समाजवादीबाट सावित्री मल्ल विजयी भएका छन् । 

सुदूरपश्चिमबाट कांग्रेसका बलदेव बोहोरा, नारायणदत्त भट्ट र माओवादीकी रेणु चन्द विजयी भएका छन् ।