विमानस्थल अध्यागमन कार्यालयका प्रमुख हमाल र अधिकृतलाई प्रहरीले हान्यो लात्ती !

त्रिभुवन विमानस्थलस्थित अध्यागमन कार्यालयका प्रमुख गोगनबहादुर हमालसहित २ जनालाई प्रहरीले हातपात गरेको कर्मचारीहरूले बताएका छन् ।

कार्यालयका अधिकृत छायाँलाल मोक्तानलाई ४/५ जना प्रहरीको टोलीले कुटपिट गरेपछि त्यस विषयमा बुझ्न जाँदा हमाललाई पनि पछाडिबाट लात्ती हानेको एक कर्मचारीले लोकान्तरसँग बताए ।

'अधिकृत मोक्तानलाई चोटपटक नै लाग्नेगरी कुटपिट भएपछि कार्यालय प्रमुख हमाल पनि आउनुभएको थियो,' ती कर्मचारीले भने, 'सीसीटीभी फूटेज हेर्ने क्रममा उहाँलाई पनि पछाडिबाट लात्ती प्रहार भयो ।'

प्रहरीले यसरी कुटपिट गर्नुको कारण खुलेको छैन ।

भिजिट भिसाको विषय बाहिर आएपछि नेपाल प्रहरी र अध्यागमनका कर्मचारीबीच विवाद छ ।

विमानस्थलमा सशस्त्र प्रहरी खटाएपछि नेपाल प्रहरी झन् असन्तुष्ट बनेको कर्मचारीहरू बताउँछन् ।