आम जनता पार्टी (आजपा) का अध्यक्ष प्रभु साहले  विदेशमा नेपाली कामदारलाई सुरक्षित बनाउन वैदेशिक रोजगार ऐन संशोधन गर्नुपर्ने बताएका छन् । विदेशमा नेपाली कामदार पठाउँदा निरन्तर ठगी हुने गरे पनि ट्रेड युनियनका नेताहरू के गर्दै छन् भन्दै प्रश्न समेत गरे । 

शनिवार राजधानीमा आयोजित आम ट्रेड युनियन फेडरेसनको राष्ट्रिय भेलालाई सम्बोधन गर्दै साहले नेपालमा बढीभन्दा बढी रोजगारी सिर्जना गरिनुपर्नेमा जोड दिए । त्यसका लागि सत्तामा बसेकाहरूको इमानदार प्रयास जरुरी रहेको भन्दै वर्तमान सरकारले त्यसतर्फ ध्यान जान नसकिने रहेको धारणा राखे । 

उनले नेपाली उद्योगमा विदेशी ल्याउनेतर्फ नलागी स्वदेशी कामदारलाई रोजगारी दिलाउनुपर्ने धारणा राखे ।  

अनामनगरस्थित तमुबुद्ध सेवा समितिको सभा हलमा सम्पन्न भेलाले शिव थापाको नेतृत्वमा १०१ सदस्यीय केन्द्रीय समितिको घोषणा गरेको छ ।