यसअघि अर्थ राज्य मन्त्री र उद्योग मन्त्रालयको नेतृत्व सम्हालिसकेका दामोदर भण्डारी फेरि मन्त्रीको रूपमा सिंहदरबार प्रवेश गरेका छन् । उनी नयाँ सरकारमा उद्योग मन्त्रीका रूपमा दोहोरिएका हुन् । २०७९ मङ्सिरमा भएको निर्वाचनमा सुदूरपश्चिम एमालेबाट बैतडीमा भण्डारी र कञ्चनपुरमा तारालामा तामाङ मात्रै निर्वाचित भएका थिए । एमाले सुदूरपश्चिमबाट भण्डारी र तामाङ गरी २ जना मात्रै प्रतिनिधि सभा सदस्य छन् । निर्वाचनलगत्तै भण्डारी उद्योगमन्त्रीका रूपमा नियुक्त भएका थिए । सत्ता समीकरण फेरिएसँगै उनी मन्त्रीबाट हटेका थिए । अहिले प्रचण्डले पुरानै समीकरण बनाएपछि गठन भएको मन्त्रिमण्डलमा भण्डारी फेरि दोहोरिएका हुन् । 

को हुन भण्डारी ? 
२० कार्तिक २०३० मा पाटन नगरपालिका –६ मा जन्मिएका भण्डारीले २०४६ सालदेखि नै राजनीति सुरु गरेका थिए । २०४८ सालमा अनेरास्ववियु बैतडीको जिल्ला कमिटी अध्यक्ष भएका भण्डारी २०५० नेकपा एमालेको बैतडी जिल्ला कमिटी सदस्य बनेका थिए । त्यसपछि क्रमशः २०५४मा जिल्ला कमिटी उपसचिव, २०५६ देखि २०६४ सम्म नेकपा एमाले बैतडीको सचिव बने । पार्टी अध्यक्षात्मक प्रणालीमा गएपछि भण्डारीले एमाले बैतडीको अध्यक्षको जिम्मेवारी पाए ।

विद्यार्थी राजनीतिबाट उदाएका भण्डारीले पार्टीको सक्रिय राजनीतिमा लगातार जीत निकाल्दै आएका छन् । २०७० सालको दोस्रो संविधान सभा निर्वाचनमा बैतडी क्षेत्र नं १ बाट जीत हासिल गरेका भण्डारीले २०७४ सालको प्रतिनिधि सभा निर्वाचनमा पनि सहजै जीत हात पारेका थिए । यस्तै २०७९ मङ्सिर ४ गते सम्पन्न भएको प्रतिनिधि सभा निर्वाचनमा माओवादी केन्द्रका नरेन्द्र कुँवरलाई पराजित गर्दै भण्डारीले प्रतिनिधि सभाको निर्वाचनमा पनि ह्याट्रिक गरी सकेका छन् ।

२०७२ सालमा केपी शर्मा ओली नेतृत्वको सरकारमा पहिलो पटक अर्थ राज्यमन्त्री बनेका भण्डारी २०७० को निर्वाचनमा बैतडी–१ बाट ११ हजार ६७२ मत ल्याएर पहिलोपटक संविधानसभा सदस्यमा निर्वाचित भएका थिए । 

२०७४ सालको निर्वाचनमा वाम गठबन्धनका तर्फबाट भण्डारीले ११ हजार २३३ को मतान्तरले कांग्रेस उम्मेदवारलाई नरबहादुर चन्दलाई हराएका थिए । एमाले सुदूरपश्चिम प्रदेशको अध्यक्ष समेत भण्डारी अहिले पार्टीको पोलिटब्युरो सदस्य हुन् ।