महाशिवरात्रि तथा २६१ औँ सेना दिवसका अवसरमा नेपाली सेनाले शुक्रवार काठमाडौंमा विविध कार्यक्रम गरेको छ ।

सैनिक मञ्च टुँडिखेलमा आयोजित कार्यक्रममा नेपाली सेनाले हेलिकप्टरबाट नेपालको राष्ट्रिय झण्डालगायत महाशिवरात्री तथा सेना दिवसको ब्यानर प्रदर्शनसहित पुष्प वृष्टि गरेको थियो ।

कार्यक्रममा राइफल र तोपबाट बढाइँ गरिनुका साथै विविध सैनिक कला र सांस्कृतिक एवं सांगीतिक प्रस्तुति गरिएको थियो ।

सो अवसरमा राष्ट्रपति रामचन्द्र पौडेलले वीर स्मारकमा पुष्पहार चढाइ शहीददहरूप्रति श्रद्धाञ्जली अर्पण गरेका थिए ।

उनले नेपाली सेनाको वार्षिक प्रकाशन सिपाही–२०८० विमोचन गर्नुका साथै फ्रि–फल जम्पमा प्रथम र द्वितीय हुने क्रमशः अमल्दार टंकबहादुर डाँगी र सेनानी जगन्नाथ दनैलाई पुरस्कार प्रदान गरे ।

त्यस्तै, कार्यक्रममा सांगीतिक प्रस्तुति दिने भारत, बेलायत र संयुक्त राज्य अमेरिकाका सैनिक ब्यान्ड टोलीका प्रमुखहरूलाई उपहार प्रदान गरेको नेपाली सेनाले जारी विज्ञप्तिमा उल्लेख छ ।​

यसअघि प्रधानसेनापति प्रभुराम शर्माले प्रधान सेनापति ब्यानर प्रतियोगिता–२०८० मा गणतर्फ प्रथम हुने श्री श्रीजंग गण र गुल्मतर्फ प्रथम हुने श्री हनुमानध्वज गुल्मलाई प्रधान सेनापति ब्यानर प्रदान गरेका थिए ।​