‘लोकान्तर राउण्ड अप’मा पाठकवृनदलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
शनिवार एकैदिन देशका विभिन्न स्थानमा आधा दर्जनभन्दा बढी आगलागीका घटना भएको छन् । आगलागीबाट मानवीयसँगै ठूलो आर्थिक क्षति पनि भएको छ ।
चैतको सुख्खा मौसम शुरू भएसँगै आगलागीका घटना पनि बढेका हुन् ।
००००
भोजपुरको हतुवागढी गाउँपालिका वडा नम्बर ७ पिप्लेमा भएको आगलागीबाट तीन बालबालिकाको मृत्यु भएको छ । 

शनिवार पौने ६ बजेतिर फुसको छानो भएको खोल्मामा आगलागी हुँदा तीन बालबालिकाको मृत्यु भएको भोजपुर प्रहरीले जनाएको छ । 
मृत्यु हुनेमा एकै घरमा दाजुभाइका छोराछोरी रहेको प्रहरीले जनाएको छ ।
००००
प्रधानमन्त्री पुष्पकमल दाहाल ‘प्रचण्ड’ले आगलागीबाट हुनसक्ने सम्भावित जोखिमप्रति पूर्वसचेतता अपनाउन अपिल गरेका छन् । 

भोजपुर लगायत पूर्वी नेपालका पहाडी जिल्लाहरूमा आगलागीबाट  धनजनको क्षति भएको घटनाप्रति गम्भीरता दर्शाउँदै उनले शनिबार  यस्तो अपील गरेका हुन् । 
प्रधानमन्त्रीले  आगलागीबाट  धनजनको क्षति भएको घटनाले आफूलाई मर्माहत तुल्याएको सामाजिक सञ्जाल फेसबुकमार्फत जनाएका छन् ।
००००
सुन तस्करीबारे छानबिन गर्न बनेको जाँचबुझ आयोगले नेपाल प्रहरीका पूर्व महानिरीक्षक (आईजीपी) धिरजप्रताप सिंहलाई निगरानीमा राख्न सिफारिस गरेको छ ।
गृह मन्त्रालय स्रोतका अनुसार आईजीपी हुँदाकै बखतमा अवैध सुन तस्करी गर्नेहरूसँग दोहोरो संवाद भएको पाइएकाले सिंहलाई निगरानीमा राख्न सिफारिस गरिएको हो ।
सुन तस्करीबारे छानबिन गर्न बनेको उच्च अदालतका पूर्वन्यायाधीश डिल्लीराज आचार्य संयोजकत्वको जाँचबुझ आयोगको प्रतिवेदनमा उक्त कुरा उल्लेख छ ।
डीएफएलबाट देखिएको तथा अरु कुराले पनि सपोर्ट हुने देखिए पछि आयोगले उनीहरूलाई निगरानीमा राख्न सिफारिस गरेको हो ।
००००
लामो समयदेखि नै पोखरालाई पर्यटकीय राजधानी मान्दै आए पनि अब भने औपचारिकरूपमै पोखरा पर्यटकीय राजधानी घोषणा गरिने भएको छ ।
पोखरा महानगरपालिकाले आइतबार औपचारिक कार्यक्रमका बीच पोखरालाई पर्यटकीय राजधानी घोषणा गर्ने तयारी गरेको छ । जसका लागि आवश्यक तयारी पुरा भइसकेको छ । प्रधानमन्त्री प्रचण्डले विशेष समारोहका बीच पोखरालाई पर्यटकीय राजधानी घोषणा गर्ने कार्यक्रम छ । 
००००
नेपाल समाजवादी पार्टीका नेता महिन्द्र यादवको समूह नेकपा माओवादी केन्द्रमा समाहित हुने भएको छ । यादव पक्षले माओवादी केन्द्रसँग पार्टी एकताको सहमतिमा हस्ताक्षर गरेको हो । 
शनिवार पार्टी एकता संयोजन समितिको बैठकले पार्टी एकताको घोषणा गर्दै चार बुँदे सहमति गरेको हो । सहमतिमा माओवादी केन्द्रका महासचिव देव गुरुङ र नेसपाका महासचिव रमेश प्रसाद यादवले हस्ताक्षर गरेका छन् । यससँगै पार्टीमा विभाजनको अवस्था आएको छ भने भट्टराई पक्षले आइतबार केन्द्रीय कार्यकारिणी समितिको बैठक बोलाएको छ ।
००००
प्रधानमन्त्री पुष्पकमल दाहाल ‘प्रचण्ड’ले व्यवसायीलाई त्रसित नबनी ढुक्क भएर लगानी गर्न आग्रह गरेका छन् । 
बाह्रखरी मिडियाद्वारा आयोजित ‘आमन्त्रण गल्फ प्रतियोगिता’ का विजयीहरूलाई आज पुरस्कार प्रदान गर्दै प्रधानमन्त्री प्रचण्डले नेपालमा केही छैन, केही हुँदैन भन्ने भाष्य परिवर्तन गर्नुपर्ने बताए ।
००००
मनी ट्रान्सफर सञ्चालक नितेश साहमाथि गोली प्रहार गर्ने तीन जना भारतीय नागरिकलाई प्रहरीले पक्राउ गरी शनिबार सार्वजनिक गरेको छ ।
भारतको बिहार पूर्वी चम्पारण जिल्ला मोतिहारी थाना चिरैया दिपही गाउँ–२ बस्ने १९ वर्षीय मुनिफकुमार यादव, सोही ठाउँका १८ वर्षीय राजकुमार पासवान र २० वर्षीय चन्द्रभानसिंह भनिने चुनुकुमार सिंह रहेको जिल्ला प्रहरी कार्यालय रौतहटले जनाएको छ ।
००००
नेविसंघको केन्द्रीय तदर्थ कार्यसमितिमा ४१ सदस्य मनोनीत भएका छन् ।
नेपाली कांग्रेसका सभापति शेरबहादुर देउवाले दुजाङ शेर्पाको अध्यक्षतामा गठित संघको केन्द्रीय तदर्थ कार्यसमिति सदस्यमा उनीहरूलाई मनोनयन गरेका हुन् ।
००००
सत्ता गठबन्धनको कार्यदलले तयार पारेको न्यूनतम साझा कार्यक्रम शीर्ष नेताहरूलाई बुझाएको छ । कार्यदलले न्यूनतम साझा कार्यक्रम तयार पारेर शनिबार बिहान प्रधानमन्त्री निवास बालुवाटारमा गठबन्धनका शीर्ष नेताहरूलाई बुझाएको हो ।
कार्यदलले गठबन्धनका शीर्ष नेता प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्ड, एमाले अध्यक्ष केपी शर्मा ओली, रास्वपा सभापति रवि लामिछाने, नेकपा एकीकृत समाजवादीका अध्यक्ष माधव नेपाललाई बुझाएको हो ।