उपप्रधान तथा गृहमन्त्री रवि लामिछानेले आफ्नो राजीनामा माग्ने प्रतिपक्षी नेपाली कांग्रेसका सांसदहरूलाई जवाफ दिँदै चार वर्ष संसद् अवरुद्ध गर्न शुभकामना दिएका छन् ।

उनले मंगलवार संसद् बैठकबाट निस्किने क्रममा सञ्चारकर्मीसँग कुरा गर्दै कांग्रेसलाई यस्तो जवाफ दिएका हुन् ।

गृहमन्त्री लामिछानेले कांग्रेसले चार वर्ष संसद् अवरोध गर्यो भने काम गरेर सरकार झनै सफल हुने भन्दै व्यंग्य गरे ।

उनले यस्तै पूरक र ठाडो उजरीका आधारमा संसद् अवरुद्धको अभ्यास गर्ने हो भने यसमा अडिरहन कांग्रेसलाई अनुरोध गरेका हुन् ।

‘यस्तो अभ्यास सिकाउन खोज्ने हो भने यसमा अडिइरहनका लागि म कांग्रेसलाई अनुरोध गर्छु । म भन्छु कांग्रेसले चार वर्ष संसद् अवरुद्ध गरोस् । हाम्रो संयन्त्रले चार वर्ष काम गरोस्,’ उनले भने, ‘देशमा अनियमितता गर्ने र अनुसन्धानलाई प्रभावित गर्ने, अनुसन्धान गर्दागर्दैका मान्छेलाई कुर्सीबाट हटाएर पठाउने कांग्रेसले नैतिकता र सुशासनको कुरा गर्न मिल्दैन ।’

कांग्रेस दूधले नुहाएको पार्टी हो कि होइन भन्ने प्रश्नको जवाफले जनताले बुझेको पनि गृहमन्त्री लामिछानेले बताए ।

सहकारी ठगीमा मुछिएका गीतेन्द्रबाबु (जीबी) राई कहिले पक्राउ पर्छन् ? भन्ने प्रश्नमा उनले भने, ‘काम गर्दैछु, गरेपछि थाहा हुन्छ, भएपछि ब्रेकिङ गर्नुहोस् !’

प्रमुख प्रतिपक्षी दल कांग्रेसले सहकारी प्रकरणमा लामिछाने जोडिएको भन्दै पदबाट राजीनामा दिनुपर्ने र यसबारे छानबिन गर्न संसदीय समिति गठनको मागसमेत गर्दै आएको छ ।