सिद्धार्थ हस्पिटालिटी ग्रुपले सञ्चालनमा ल्याएको भैरहवाको 'सिद्धार्थ भिलासा'ले पाँच तारे होटल स्तरको मान्यता पाएको छ ।

'भिलासा’ सिद्धार्थ ग्रुपको लग्जरी ब्रान्ड हो । पर्यटन विभागले हालै होटलको स्थलगत अनुगमन तथा निरीक्षण गरेको थियो । त्यसपछि २६ वर्षको अनुभव बटुलेको ग्रुपले सञ्चालन गरेको होटललाई पाँच तारे मान्यता दिएको हो ।

‘लुम्बिनी प्रदेशमा सञ्चालित उक्त होटललाई पर्यटन ऐन अनुसार पाँच तारा स्तरको होटलमा स्तर वर्गीकरण गरी यो इजाजतपत्र दिइएको छ’, पर्यटन विभागले भनेको छ ।

करिब ५ बगाहा क्षेत्रफलमा विस्तारित होटलमा एउटा भिलासा भि-एक्जुकेटिभ स्विट, २ वटा स्विट, ५ वटा जुनियर स्विट र  ७७ एक्जुकेटिभ डिलक्स  गरी ८५ वटा रुम रहेका छन्  ।

होटलमा साना ठूला गरी  पाँच वटा कन्फ्रेरेन्स हल र पाँच वटै रेस्टुरेन्ट आउटलेट रहेका छन् ।

होटलमा पन्ध्र सय जना क्षमताको व्याङक्वेट हल रहेको छ जुन नेपालकै ठूलो व्याङक्वेट हल भएको सिद्धार्थ हस्पिटालिटी ग्रुपका प्रमुख कार्यकारी अधिकृत कृष्ण न्यौपानेले बताए ।

स्थापनाको छोटो समयमै 'डेस्टिनेसन वेडिङ’ र अन्य पर्यटक गरी त्यस क्षेत्रमा उच्च सङ्ख्यामा भारतीय पर्यटक भित्र्याउन होटल सफल बनेको छ ।

लुम्बिनी घुम्न आउने विभिन्न देशका पर्यटकहरूबीच लोकप्रिय भइरहेको होटलले पाँच तारा स्तरको मान्यता पाएसँगै व्यवसायमा अझ राम्रो गर्ने विश्वास गरिएको न्यौपानेले बताए ।

होटलमा जिम, ज्याकुजी, स्टिम, स्पा लगायत वेल्नेस सुविधा उपलब्ध छन् । हाल २ सय जनाले रोजगारी पाएकोमा अब केही समयमै क्यासिनो सन्चालन पश्चात् झण्डै ५ सय जनालाई रोजगारी मिल्ने सीईओ न्यौपानेले बताए ।

नेपालकै उत्कृष्ट बनाउने गरी क्यासीनोको लागि संरचनासमेत निर्माण भइसकेको छ ।

यस्तै यस क्षेत्रमा आन्तरिक तथा बाह्य पर्यटन प्रबर्द्धनमा होटलले ठूलो भूमिका निर्वाह गर्ने कम्पनीका अध्यक्ष लक्ष्मण न्यौपानेले बताए ।