कोशी प्रदेश सरकारका मुख्यमन्त्री केदार कार्कीलाई नेपाली कांग्रेसले राजीनामा दिन सुझाव दिएको छ ।

कांग्रेसबाट विद्रोह गरेर मुख्यमन्त्री बनेका कार्की माओवादी केन्द्र र नेकपा एमालेले सरकारलाई दिएको समर्थन फिर्ता लिएसँगै अल्पमतमा परेका छन् ।​

संसद्को अंकगणित हेर्दा विश्वासको मत प्राप्त गर्ने सम्भावना नदेखिएकाले मुख्यमन्त्रीले राजीनामा दिनु उचित हुने कांग्रेस संसदीय दलका नेता उद्धव थापाले बताए ।

‘अहिले हाम्रो संसदीय दलको बैठक त बसेको छैन', उनले भने ‘कोशी प्रदेशमा संसद् विघटन गर्ने सम्भावना पनि नभएकाले मुख्यमन्त्रीले राजीनामा दिएर मार्ग प्रशस्त गरिदिनुपर्छ ।’

सरकारमा रहेका दलहरूसँग पनि थप छलफल गर्ने उनको भनाइ रहेको छ ।

‘मध्यावधिमा जानु पनि हुँदैन, मध्यावधिको अहिले समय पनि छैन । मध्यावधिको पक्षमा जनता तथा दलहरू पनि छैनन् । विश्वासको मत प्राप्त गर्न सक्ने अवस्था पनि रहेन त्यसैले कोशी प्रदेशको स्थायित्व र स्थिरताको लागि कांग्रेस बाधक बन्नु हुँदैन’, उनले भने । 

नेकपा एकीकृत समाजवादी र जसपा भने नयाँ गठबन्धन प्रति मौन छन् । सरकारलाई दिएको विश्वासको मत फिर्ता लिएपछि कोशी प्रदेशका मुख्यमन्त्री केदार कार्की अल्पमत परेका छन् ।

गत असोज २७ गते केदार कार्की एमालेका ३९ सांसदको समर्थनमा मुख्यमन्त्री बनेका थिए ।