कोशी प्रदेशसभाको सार्वजनिक सार्वजनिक लेखा समितिलाई मन्त्रालयले जवाफ दिन अटेरी गरेको छ । मुख्यमन्त्री केदार कार्कीको अगुवाइमा गत फागुन ९ गतेदेखि १७ गतेसम्म गरेको हात्तीमैत्री पदयात्राबारे लेखा समितिले ५ बुँदे प्रश्न सोधेर पर्यटन, वन तथा वातावरण मन्त्रालयलाई लिखित जवाफ मागेको थियो । 

लेखा समितिको चैत १४ गते बसेको बैठकले निर्णय गरेरै जवाफ मागेको तर मन्त्रालयले जवाफ दिन अटेर गरेको सार्वजनिक लेखा समितिका जेष्ठ सदस्य (सभापति) किशोरचन्द्र दुलालले जानकारी दिए ।

‘हामीले सात दिनभित्रमा लिखित जवाफ दिन भनेका थियौ,’ उनले भने ‘पुनः अर्को पत्र पठाएका छौँ । तर जवाफ दिन अटेर गरिएको छ ।’

उनका अनुसार लेखा समितिले कार्यक्रममा कुन खर्च शीर्षकबाट कति रकम खर्च गरियो भन्ने प्रश्न उठाइएको थियो ।

समितिले कार्यक्रममा रकम खर्च गर्दा के–कस्ता कानूनी र लेखाका प्रक्रिया अवलम्बन गरियो ? कार्यक्रममा प्रदेश संचित कोषबाट खर्च गर्दा भविष्यमा बेरुजु नहुने आधार के–के छन् ? र कार्यक्रमबाट हात्ती र मानवबीचको द्वन्द्व न्यूनीकरणका लागि ठोस र मूर्त रुपमा के परिणाम प्राप्त हुने उद्देश्य राखियो तथा पूरा हुने आधार के छन् ? जस्ता प्रश्न सोधेको थियो । 

मुख्यमन्त्री कार्कीसहितको टोलीले झापादेखि उदयपुरसम्मका २४ स्थानीय तह, ५६ सामुदायिक र चार साझेदारी वन क्षेत्रहुँदै २४३ किलोमिटर पैदल यात्रा गरेका थिए । टोलीमा उनीसहित निर्वतमान पर्यटनमन्त्री गणेश उप्रेती, मन्त्रालयका सचिव विशाल घिमिरे, हात्तीविज्ञहरूसहित दैनिक ८० जना भन्दा बढी सहभागी थिए । 

पदयात्रा मानव–हात्तीबीचको द्वन्द्वको कारण पहिचान र समस्या निराकरणमा केन्द्रित रहेको जनाइएको थियो । यो कार्यक्रम मुख्यमन्त्री कार्कीकै जोडबलमा गरिएको थियो ।