एसीसी प्रिमियर कपमा आज नेपालले कतारसँग खेल्दैछ । नेपाल र कतारबीचको खेल ओमानको अल अमिरत क्रिकेट ग्राउन्डमा नेपाली समयानुसार अपराह्न सवा ४ बजेदेखि शुरू हुनेछ।

पहिलो खेलमा नेपालले मलेसियालाई पराजित गर्दै विजयी शुरूवात गरेको थियो । शुक्रबार नेपालले मलेसियालाई ५ विकेटले पराजित गरेको थियो ।

१० टिम सहभागी प्रतियोगिताको नेपाल साविक विजेता हो । नेपालको समूहमा मलेसिया, कतार, हङकङ र साउदी अरेबिया छन् ।   

आयोजक ओमान समूह ‘बी’ मा छ । समूहमा ओमानसहित यूएई, कुवेत, बहराइन र कम्बोडिया छन् । नेपालले तेस्रो खेल हङकङसँग वैशाख  ३ गते र चौथो खेल साउदी अरेबियासँग वैशाख ५ गते खेल्नेछ ।

समूहमा शीर्ष दुई टिम सेमिफाइनल पुग्नेछन् । सेमिफाइनल वैशाख ७ गते र फाइनल वैशाख ९ गते हुनेछ । यो प्रतियोगिता जित्ने टिम सन् २०२५ को एसिया कपमा पुग्नेछ । शीर्ष तीन टिमले एसीसी इमर्जिङ टिम्स एसिया कप खेल्नेछन् ।