नेपाली कांग्रेसका महामन्त्री गगन थापाले सहकारी ठगीमा गृहमन्त्री रवि लामिछानेमाथि संसदीय छानबिनको औचित्य झनै पुष्टि भएको बताएका छन् । प्रहरीको अनुसन्धान विश्वसनीय नभएकाले आफूहरूले संसदीय छानबिनको कुरा गरिरहेको उनले बताए । 

संवाद यात्राका क्रममा मंगलवार कञ्चनपुरको पुनर्वासमा आयोजित कार्यक्रममा महामन्त्री थापाले सहकारी ठग्न रवि लामिछाने र गृहमन्त्री लामिछाने एउटै हुन्–होइनन् भनेर प्रहरीले छुट्याउन नसकेका कारण संसदीय छानबिनको औचित्य पुष्टि भएको बताएका हुन् ।

‘संसदमा यति कुरा भनियो– सहकारीको रकम अपचलन भएको छ, प्रहरीको अनुसन्धान विश्वसनीय छैन । त्यसकारण संसदीय छानबिन आवश्यक छ । हामीले भनेको कुरा प्रमाणित भयो,’ उनले भने, ‘हिजो सरकारी वकिलले प्रहरीको अनुसन्धानलाई आधार बनाएर मुद्दा दायर गर्यो । प्रहरीले के भन्यो भने– सहकारीमा ठगी गर्ने र अहिलेको गृहमन्त्री एउटै हुन्–होइनन् भनेर जाँच्ने मसँग क्षमता छैन भनेपछि अब संसदीय बनाएर खोज्नु पर्यो कि परेन ?’ 

बुटवलको सुप्रिम सहकारी ठगीमा रविको संलग्नताको प्रमाण प्रहरीले गरेको अनुसन्धान प्रतिवेदनमा फेला परेको थियो । ‘जनतामा लोकप्रिय छु, सरकारका शक्तिशाली छु भन्दैमा नयाँ दलको नेतालाई छानबिन गर्नु पर्दैन ?’ थापाले प्रश्न गरे । 

कांग्रेसले सहकारी ठगीमा लामिछानेको संलग्नता रहेको भन्दै गत चैत ६ गतेदेखि संसद्मा लगातार संसदीय छानबिनको माग राख्दै आएको छ ।