इजरायलले इरानमाथि मिसाइल हमला गरेको छ । इजरायलले शुक्रबार बिहान इरानमाथि जवाफी आक्रमण गरेको दुई अमेरिकी अधिकारीलाई उद्धृत गर्दै बीबीसीले जनाएको छ । 

इरानी समाचार एजेन्सीका अनुसार शुक्रबार बिहान इरानको उत्तर-पश्चिमी सहर इस्फाहानमा विस्फोटको आवाज सुनिएको थियो । इरानको सरकारी सञ्चारमाध्यमका अनुसार देशको वायु रक्षा प्रणाली धेरै प्रान्तमा सक्रिय भएको छ । इरानको सरकारी मिडिया आईआरआईबीले विश्वसनीय स्रोतलाई उद्धृत गर्दै भनेको छ कि देशका धेरै भागहरूमा सुनिएको विस्फोट एयर डिफेन्स सिस्टमले अज्ञात मिनी ड्रोनहरूलाई लक्षित गरेको कारण भएको हो ।

इजरायल–हमास युद्ध चलिरहेकै बेला शनिबार इरानले एकैरात इजरायलमा तीन सयभन्दा धेरै ड्रोन तथा क्षेप्यास्त्र आक्रमण गरेको थियो । इरानले प्रहार गरेका तीन सयभन्दा धेरै ड्रोन तथा क्षेप्यास्त्रमध्ये ९९ प्रतिशतभन्दा धेरैलाई प्रतिरक्षा प्रणालीले नष्ट गरिदिएको थियो । ड्रोन तथा क्षेप्यास्त्र नष्ट गर्न इजरायललाई अमेरिका, बेलायत र फ्रान्सलगायत देशले पनि सहयोग गरेका थिए । 

इरानको सरकारी सञ्चारमाध्यमले विश्वसनीय स्रोतलाई उद्धृत गर्दै परमाणु हतियारसँग सम्बन्धित साइटहरू सुरक्षित रहेको बताएको छ । समाचार एजेन्सी एपीका अनुसार इरानी सञ्चारमाध्यममा पनि धेरै सहरमा उडान रद्द गरिएको खबर आएको छ । उडानहरू रद्द गरिएका शहरहरूमा तेहरान, शिराज र इस्फाहान पर्छन् ।

इजरायलले मिसाइल हानेकोमा इरानले चेतावनी दिएको छ । इरानी अखबार तेहरान टाइम्सका अनुसार इरानको परमाणु सुरक्षा प्रमुख जनरल अहमद हकतलबले आफ्नो परमाणु स्थललाई निशाना बनाए इजरायललाई गम्भीर प्रतिक्रिया दिइने चेतावनी दिएका हुन् ।

उनले भनेका छन्, ‘यहुदी शासकले हाम्रो परमाणु सुविधा र केन्द्रविरुद्ध कारबाही गर्ने निर्णय गरेको हो भने उसले हाम्रो प्रतिक्रियाको सामना गर्नुपर्ने छ ।’ घुमाइरो पारामा उनले इजरायल पछि नहटे परमाणु हतियारको प्रयोग गर्नेसम्मको धम्की दिएका छन् ।

यसअघि इरानका विदेशमन्त्री हुसेन अमिर-अब्दुल्लायानले इजरायलले कुनै पनि प्रतिशोधात्मक कारबाही गरेमा तुरुन्त र ठूलो मात्रामा जवाफ दिइने बताएका थिए।

अप्रिल १ मा सिरियाको राजधानी दमास्कसमा रहेको इरानी दूतावासमा हमला भएको थियो । यस हमलामा एक वरिष्ठ जनरल सहित कुल १३ जनाको मृत्यु भएको थियो । इरानले यस आक्रमणको लागि इजरायललाई जिम्मेवार ठहर गरेको छ । तर, इजरायलले सो आक्रमणको प्रत्यक्ष जिम्मेवारी लिएको छैन ।

केही मत्थर हुँदै गएको मानिएको इजरायल-हमास युद्धमा घिउ थप्ने गरी इरानले आक्रमण गरेपछि मध्येपूर्वमा तनाब बढेको थियो । अब इजरायलले जवाफी कारबाही गरेपछि मध्येपूर्वमा 'दीर्घकालीन क्षेत्रीय युद्ध' हुने आशंका बढेको छ ।