रविको नाम नराखी छानबिन समिति बनाउने कुरा बिरामीको नाम नलेखी गरिने अप्रेसनजस्तो– विश्वप्रकाश

नेपाली कांग्रेसका महामन्त्री विश्वप्रकाश शर्माले उपप्रधान एवं गृहमन्त्री रवि लामिछानेको नाम उल्लेख नगरी संसदीय छानबिन बनाउनुको अर्थ नहुने बताएका छन् । त्यस्तो समिति नाम नलेखिएका बिरामीको एपेन्डिक्सको अप्रेसन गरेजस्तो हुने उनले बताए । 

शुक्रवार संसद् भवन परिसरमा पत्रकारहरूसँग कुरा गर्दै महामन्त्री शर्माले सहकारी ठगी सम्बन्धमा बन्ने संसदीय छानबिन समितिमा लामिछानेको नाम उल्लेख हुनुपर्ने बताएका हुन् । ‘सहकारी ठगीको विषयमा लामो कुरा केही छैन, जसरी अस्पतालमा आएका सबै बिरामीको अप्रेसन गरिँदैन । एपेन्डिक्सको अप्रेसन गर्ने भन्दैमा हस्पिटलमा आएका सबैको त गरिँदैन नि, जो बिरामी हो त्यसैको गर्ने होला,’ शर्माले भने, ‘कागजमा कसैको नाम लेखेपछि समिति बन्नु र नबन्नुको अर्थ हुँदैन ।’

सहकारी ठगीमा छानबिन गर्न नेकपा (एमाले)को आनाकानी र गिरिबन्धु टी स्टेटको जग्गा घोटालामा छानबिन गर्न सरकार तयार नभएको भन्दै उनले वर्तमान सत्ता गठबन्धनलाई ‘सहकारी बन्धु’ भन्दै टिप्पणी गरे । 

महामन्त्री शर्माले संसदमा विपक्षीलाई निषेध गर्ने एमाले अध्यक्ष केपी शर्मा ओलीको भनाइ र सभामुख देवराज घिमिरेको कार्यशैली मिलेको टिप्पणी गरे । ‘केपी ओलीले कांग्रेसलाई अब बोल्न दिइने छैन भन्नुभएको थियो, सहकारी बन्धु गठबन्धनको शैली ठीक देखिएन । संसदमा प्रतिपक्ष बोल्दा वातावरण असहज बन्दैन,’ उनले भने ।