रवि लामिछानेका कारण नयाँ शक्तिलाई नाक देखाउने ठाउँ भएन : ज्ञानेन्द्र शाही

राष्ट्रिय प्रजातन्त्र पार्टीका सांसद ज्ञानेन्द्र शाहीले गृहमन्त्री रवि लामिछानेको कारण आफूहरूलाई नाक देखाउन गाह्रो भएको बताएका छन् ।

प्रतिनिधि सभाको बैठकमा विपक्षीको तर्फबाट बोल्दै शाहीले विपक्षमा हुँदा र एउटा सत्तापक्षमा हुँदा अर्को बोली बोल्ने गृहमन्त्री रवि लामिछानेको कारण नयाँ शक्तिलाई नाक देखाउनै गाह्रो भएको बताएका हुन् ।

‘यिनीहरूले काम गरेरनन् भनेर विकल्पमा हामीलाई भोट हालेको हुन् । इतिहास हेर्नुस्, पार्टी संगठन थिएन । यिनीहरूले  काम गर्न सकेनन् भनेर हामी आएका होइनौं । तर हिजो  विपक्षमा हुँदा एउटा कुरा आज सत्तापक्ष हुँदा अर्को कुरा गर्न सुहाउँछ ?’, शाहीले भने, ‘गृहमन्त्री'ज्यू सहकारी ठगीमा छानबिन समिति बनाउन दिनुस् । दोषी भएर कारबाही, निर्दोष भए फेरि गृहमन्त्री हुनुहोला । छानबिन समिति गठन गर्दैमा, छानबिन गर्दैमा दोषी हुँदैन । तर नयाँ शक्तिलाई तपाईंको कारण नाक देखाउने ठाउँ भएन ।’

सहकारी ठगी प्रकरणमा छानबिन समिति बनाएर जनतालाई न्याय दिनुपर्ने उनले बताए ।​

संसद्को विपक्षी र सत्ताको एउटै कुर्सीमा बसेर अलग-अलग चरित्र नदेखाउन पनि उनले गृहमन्त्री लामिछानेलाई चुनौती दिए ।

‘संसद् संसदजस्तो भएको छैन । संसद्को विपक्ष र सत्ता पक्षको दाहिने र देब्रे कुर्सीमा बस्दा मान्छेको चरित्र अर्को हुनुहुँदैन । यही कुर्सीमा बसेर गृहमन्त्रीले जसको नाम आएको छ छानबिन गरौं भन्नुभयो । छानबिन गर्न प्रधानमन्त्री र गृहमन्त्री डराउने भनेर तीन महिना अघि भन्नुभएको होइन ? खुट्टा कमाउन भएन भन्नुभएको होइन', शाहीले भने, ‘सहकारी पीडितको बास सडकमा भएको छ । मकै र सागको मुठा बेचेको पैसा हो । कुनै अरबपति र खरबपतिको पैसा होइन । नेपाली जनतालाई मार्ने अधिकार कसैको छैन ।  गृहमन्त्रीको शब्द लिएर भन्छु मुटु छकि छैन ? डराएको हो ? खुट्टा  कमाएको हो ? अब छानबिन समिति आवश्यक देखिन्छ ।’

सहकारी उस्तै प्रकरणमा आफ्नै राप्रपाकै सांसद गीता बस्नेतलाई पक्राउ पुर्जी जारी हुँदा गृहमन्त्रीलाई किन हुँदैन भन्दै शाहीले प्रश्न उठाएका छन् ।

‘यो संसद्‌मा दुई वटा कानून छ कि एउटा ? गीता बस्नेतको कुरा गर्दैछु । सहकारीमा ज्वाईंले खाता खोल्नुहुन्छ । बर्दियाको कृष्णसारको रेष्टुरेण्टमा लगानी भएको छ । गीता बस्नेत सहकारीको सदस्य पनि हुनुहुँदैन । तर संसद्को सदस्य गीता बस्नेतलाई पक्राउ पुर्जी जारी हुन्छ', शाहीले भने, ‘त्यस्तै गोर्खा मिडियामा पैसा आउँछ, तर गृहमन्त्री पदमै हुनुहुन्छ छानबिन गर्न हुँदैन ? म गीता बस्नेतलाई कारबाही हुनुहुँदैन भन्ने पक्षमा छैन, प्रधानमन्त्री नै भए पनि कानून सबैको लागि बराबर हो ।  हिजो प्रतिपक्षमा हुँदा एउटा आज सरकारमा पुग्दा अर्को भन्ने हुँदैन । यसरी फरक बोली बोल्न पाइँदैन ।’