काठमाडौं, ३ माघ-समाजसेवी अनुराधा कोइरालालाई सरकारले प्रदेश नम्बर ३ को प्रदेश प्रमुख तोकेको छ । कोइरालालाई प्रदेश प्रमुख तोक्न लागिएको खबर सार्वजनिक भएलगत्तै उनी अंगीकृत नागरिक रहेको चर्चा चल्यो ।

तर, कोइरालाले आफू वंशजकै नागरिक रहेको भन्दै अंगीकृत भनेर चलाइएको हल्लाबारे अनविज्ञता प्रकट गरेकी छन् । कोइराला अंगीकृत नागरिक रहेको र प्रदेश प्रमुख बन्न नसक्ने भन्दै चर्चा भएपछि कोइरालाले यस्तो प्रतिक्रिया दिएकी हुन् ।

'म वंशजकै आधारमा नेपाली नागरिक हुँ,' कोइरालाले लोकान्तरसँग भनिन्, 'मलाई बाहिर चलेको हल्लाबारे केही भन्नु छैन ।'

प्रदेश प्रमुख नियुक्त गर्न लागिएको भनेर आफूलाई प्रधानमन्त्रीले नै जानकारी गराएको उनले बताइन् । 'उहाँ (प्रधानमन्त्री) ले ४/५ दिनअघि नै तपाईँ गभर्नर (प्रदेश प्रमुख) बन्दै हुनुहुन्छ भनेर जानकारी दिनुभएको हो,' कोइरालाले भनिन्, 'अहिले तपाईँले पनि फोन गर्नुभयो, धेरैजनाले फोन गरिसक्नुभएको छ ।'

कोइरालाको नागरिकताको प्रतिलिपि नै सार्वजनिक भइसकेको छ । जसमा उनले ओखलढुंगाबाट वंशजका आधारमा नागरिकता लिएको देख्न सकिन्छ ।

कोइराला माइती नेपालकी अध्यक्ष हुन् । चेलीबेटी बेचबिखन न्यूनिकरणमा खेलेको भूमिका र दु:ख पाएका महिलाहरुको संरक्षणमा खेलेको भूमिकाको कदर गर्दै अमेरिकन टेलिभिजन च्यानल सीएनएनले उनलाई 'सीएनएन हिरो' घोषित गर्दै सम्मान गरेको थियो ।

हेर्नुहोस् कोइरालाको नागरिकता-