टीकापुर घटना : सांसद् रेशम चौधरीको मुद्दाको अन्तिम फैसला केहीबेरमा

धनगढी- जिल्ला अदालत कैलालीले टीकापुर घटना मुद्दाको अन्तिम फैसला बुधवार सुनाउने तयारी थालेको छ ।

फागुन १५ गतेदेखि शुरू भएको वादी र प्रतिवादी पक्षको कानून व्यवसायीहरूको बहस मंगलवार सकिएपछि मुद्दाको फैसला केही बेरमा आउने अदालत स्रोतले जनाएको छ ।

घटना घटेको झण्डै ४२ महिनापछि जिल्ला न्यायधीश पर्शुराम भट्टराईको एकल इजलासबाट भइरहेको मुद्दाको फैसालालाई निकै चासोको साथ हेरिएको छ । मुद्दाको पेशी अन्तरगत वादी तथा सरकारी पक्षबाट जिल्ला न्यायधिवक्ता विष्णु पौडेल र सहायक न्यायधिवक्ता लक्ष्मी शर्माले बहस गरेका थिए । त्यस्तै प्रतिवादी पक्ष एंव थरुहट/थारुवान आन्दोलनकारी तर्फबाट आधा दर्जन बढी कानून व्यवसायीहरूले बहस गरेका थिए ।

प्रतिवादी तर्फबाट वरिष्ठ अधिवक्ता गोपाल कृष्ण घिमिरे, अधिवक्ता दिनमणी पोखरेल, हरि फुँयाल, मिलन राई, गंगाराम उपाध्याय, नाथुराम महतो, जोहारीलाल चौधरी, गम्भीर सिंह ऐर, गजेन्द्रबहादुर केसी, वीरबहादुर जेठारालगायत कानून व्यवसायीले बहस गरेका थिए ।

परस्पर विरोधी थरुहट/थारुवान र अखण्ड सुदूरपश्चिम आन्दोलनको क्रममा टीकापुर घटना घटेको थियो । २०७२ भदौ ७ गते थरुहट आन्दोलनकारीहरूले सरकारी कार्यालयमा ‘थरुहट प्रदेश’ भित्ते लेखनको लागि टीकापुरमा भेला भएका थिए । यसैबीच भित्ते लेखनमा प्रहरीले अवरोध गरेपछि आक्रोशित आन्दोलनकारी र प्रहरीबीच झडप हुँदा ८ प्रहरीसहित १ नाबालकको ज्यान गएको थियो । घटना घटाएको अभियोगमा सांसद रेशम चौधरीसहित ५८ जनाविरुद्ध डाँका चोरी, कर्तव्य ज्यान र ज्यान मार्ने उद्योग अन्तर्गत मुद्दा दायर गरिएको थियो । 

जिल्ला अदालत कैलालीको सुरक्षा व्यवस्थामा कडाई गरिएको छ । जिल्ला प्रहरी कार्यालय कैलालीका प्रहरी नायब उपरीक्षक हरि ओली नेतृत्वको टोली अदालतमा तैनाथ भएको छ ।