धनगढी- गत बुधबारयता सुदूरपश्चिम प्रदेशका मन्त्री, सांसद एंव जनप्रतिनिधिलाई एउटा म्यासेजले हैरान बनाएको छ ।

दिनमा सयौं मोबाइल प्रयोगकर्ताले एउटै म्यासेज पठाउन थालेपछि उनीहरु हैरान बनेका हुन् । त्यो म्यासेजमा न त कुनै अश्लीलता छ, न त कुनै गालीगलौज र माया प्रिती । बस् 'विकासको काम छिटो गर' भनिएको छ ।

प्रतिनिधिसभा सदस्य एंव नेकपाका नेता भीम रावल र लेखराज भट्ट लगायत नेताहरूलाई सम्प्रेषण गरिएको म्यासेजमा उल्लेख छ – ‘धनगढी–दिपायल सडकखण्ड कहिले कालोपत्रे बन्छ ? के यो सडकखण्ड कालोपत्रे गर्नेलगायत एजेण्डाहरु तपाईका चुनावी नारा मात्रै हुन् ?’

रुख कटानको अनुमति नपाउँदा झण्डै एक वर्षदेखि अलपत्र अवस्थामा रहेको धनगढी–दिपायल फाष्ट ट्रयाकको काम अगाडि बढाउन माग गर्दै स्थानीयबासीले दवावमूलक आन्दोलन शुरु गरेका छन् ।

धनगढी र दिपायल जोड्ने छोटो दूरीको आयोजना संघीय सरकारअन्तर्गत छ । यो आयोजना शुरू भएको दशक पुग्दा समेत ट्रयाक खोल्ने काम पूरा हुन सकेको छैन । फाष्ट ट्रयाक अगाडि बढाउन माग गर्दै संघर्ष समिति बनाएर स्थानीय आन्दोलन उत्रिएका हुन् ।

यसैबीच स्थायीयले नेताहरुलाई समूहिक म्यासेज पठाएर दवाव सिर्जना गरिरहेका छन् । फाष्ट ट्रयाक निर्माण दबाव संघर्ष समितिका संयोजक कुवेरबहादुर शाहीका अनुसार यहाँका ११ जना नेतालाई दैनिक सयौं जनाले एउटै म्यासेज पठाएर दबाव सिर्जना गरिरहेका छन् ।

प्रतिनिधिसभा सदस्य एवं नेकपा नेता लेनखराज भट्ट, भीम रावल, नारदमुनी राना, मुख्यमन्त्री त्रिलोचन भट्ट, प्रदेश अर्थ मन्त्री झपट बोहरा, सामाजिक विकास मन्त्री कृष्णराज सुवेदी, भौतिक पूर्वाधार मन्त्री पठानसिंह बोहरा, सांसद डिल्लीराज पन्त, दीर्घ सोडारी, धनगढी उपमहानगरपालिकाका मेयर नृप वड, अत्तरिया नपाका मेयर हरिसिंह साउदलगायत नेतालाई स्थानीयले म्यासेज पठाउन थालेका हुन् ।

दिनमा एउटै म्यासेज सयौंजनाले पठाउन थालेपछि नेताहरु हैरान भएका छन् । उनीहरूले अब चाँडै अगाडि बढ्ने समेत स्थानीयहरुलाई प्रतिक्रिया दिन थालेको संयोजक शाहीले जनाए ।

आवागमनमा रोक

यसैबीच स्याउलेका स्थानीयले फाष्ट ट्रयाकअन्तर्गत धनगढी–स्याउले खण्डमा ४ पांग्रे सवारीसाधन संचालनमा रोक लगाएका छन् । स्याउलेबाट धनगढीतर्फ आउने ट्रयाक्टर, ट्रकलगायतका सवारी साधन संचालनमा दुई दिनदेखि रोक लगाइएको संघर्ष समितिका संयोजक हेमबहादुर बिष्टले बताए ।

फाष्ट ट्रयाकको धनगढी–स्याउले खण्ड ठाउँठाउँमा भत्किँदा आवतजावत गर्न सास्ती भएपछि दबावमूलक आन्दोलन थालिएको उनले बताए । फाष्ट ट्रयाकअन्तर्गत यसअघि अत्तरियाको स्याउलेदेखि दिपायलसम्म सडक रहेकोमा गतवर्ष धनगढी हसनपुरदेखि स्याउलेसम्मको करीब ८ किलोमिटर सडक पनि फाष्ट ट्रयाकअन्तर्गत राखिएको हो । सरकारले काम अगाडि नबढाउँदा हसनपुर–स्याउले खण्डमा आवतजावत निकै सास्ती भएको स्थानीयको भनाइ छ ।

अहिले कम्तीमा उक्त खण्डको काम शुरू गर्नुपर्ने आफूहरुको माग रहेको बिष्टले बताए । ‘हामीले दैनिक यात्रा गर्नुपर्ने सडकमा ठूलाठूला खाल्डा छन् । सवारी साधन गुड्दा उड्ने धुलोले हिँड्नेलाई मात्र नभई सडक आसपास घर भएकाहरुले समेत सास्ती खेप्नु परिरहेको छ,’ स्थानीय मिना धामीले भनिन्, ‘कम्तीमा मर्मतसम्म गरिदिए सहज हुन्थ्यो ।’

अत्तरिया हुँदै जाने राजमार्गको बाटोभन्दा छोटो पर्ने भएकाले अधिकांश धनगढी हसनपुर–स्याउले सडक खण्ड भएर ओहोरदोहोर गर्छन् । करिब ८ वर्षअघि ओटासिल प्रविधिबाट कालोपत्रे गरिएको यो खण्डको कालोपत्रे पुरै भत्किएको छ । ग्राभेल गरिएको ठाउँमा खाल्डाखुल्डी परेका छन् । फास्ट ट्रयाकको काम यो खण्डबाट अगाडि बढाउनुपर्ने स्थानीयले माग गरेका छन् ।

संघर्ष समितिका संयोजक बिष्टले फाष्ट ट्रयाकको काम अगाडि नबढ्दा धनगढी–खुटिया खण्डमा हिंडडुल गर्न आफूहरुले सास्ती व्यहोर्नु परिरहेको बताए । उक्त खण्ड फाष्ट ट्रयाकमा परेको भनेर स्थानीय तहले समेत मर्मत गर्न छाडेपछि समस्या बढेको उनले बताए ।