आन्दोलित जनताले पत्याएनन् सांसद लेखराज भट्टको आश्वासन !

धनगढी – कैलालीको धनगढी–खुुटिया–गडसेरा–दिपायल सडकखण्ड कालोपत्रेको लागि १ सातादेखि आह्वान गरिएको आन्दोलन जारी राखिएको छ ।

प्रतिनिधिसभा सदस्य तथा नेकपाका नेता लेखराज भट्टले खुटिया–धनगढी सडकखण्ड तत्काल कालोपत्रे गरिने बताएपनि स्थानीयले आफ्ना संघर्षका कार्यक्रम जारी राखेका छन् ।

पूर्वमन्त्री समेत रहेका नेता भट्टले स्थानीयबासी एवं संघर्ष समितिसँग अन्तक्र्रिया गर्दैै तत्काल कालोपत्रे गरिने बताएका थिए । आफू सडकको अवस्थावारे जानकार रहेको र सुदूरपश्चिमका मुुख्यमन्त्री त्रिलोचन भट्टलाई समेत जानकारी गराएको बताउँदै उनले सडक राष्ट्रिय गौरवको योजनामा पर्ने भएकाले केही ढिलाइ भएपनि ४ लेनको सडक बनाइने आश्वासन दिए । उनले स्थानीयलाई सडककै लागि आन्दोलन नगर्न समेत आग्रह गरेका थिए ।

तर स्थानीयले सडकमा ठूला सवारीसाधन अझैसम्म चल्न दिएका छैनन् । जिल्लाको धनगढी उपमहानगरपालिका र गोदावरी नगरपालिकाले आ–आफ्नोे क्षेत्रमा पर्ने धुुलाम्य सडकखण्डमा पानी हाल्ने शर्तमा ट्रक, टिप्पर, बसलगायत ठूूला सवारीबाहेक साना सवारी मात्रै चल्न दिएका छन् ।

धनगढी–खुटिया सडक संघर्ष समितिका संयोजक कुबेरबहादुर शाहीले तत्काल खुटिया सडक कालोपत्रेको काम शुरू गरेपछि आन्दोलन रोक्ने बताए । खुटिया–दिपायल सडकखण्डमा तत्काल ट्रयाक खोल्ने काम गर्नुपर्ने उनले माग गरे ।

‘हाम्रो पीडा कसले बुुझ्ने हो ? अब हामी उधारो आश्वासन पत्याउनेवाला छैनौं । काम शुुरू गर्नुुपर्यो । अनि मात्रै विश्वासको वातावरण बन्छ,’ शाहीले थपे ।

नेता र सरकारले फास्ट ट्रयाकबारे स्थानीयलाई गुुमराहमा राखेको आरोप समेत लगाएका छन् । नेताहरूले धनगढी–खुुटिया–दिपायलसम्म फास्ट ट्रयाक अन्तर्गत पर्ने भन्दै भोट मागेपनि फास्ट ट्रयाक अन्तर्गत धनगढी–खुटिया सडकलाई नराखिएको दावी गरे । सञ्चार तथा सूूचना प्रविधि मन्त्रालयले माघ २४ गते जारी पत्रलाई इंगित गर्दै संयोजक शाहीले फास्ट ट्रयाक अन्तर्गत खुटिया–विपीनगर–गड्सेरा–दिपायल मात्रै परेकाले नेताहरूले जनतालाई गुुमराहमा राखेर राजनीति गरेको आक्रोश समेत पोखे ।

रुख कटानीको अनुमति नपाएपछि झण्डै १ वर्षदेखि अलपत्र अवस्थामा रहेको धनगढी–दिपायल सडक खण्डाको काम अगाडि बढाउनुपर्ने माग गर्दै स्थानीयबासी दबाबमूलक आन्दोलन गर्दै आएका छन् ।

स्थानीयले नेताहरूलाई सामूहिक म्यासेज पठाएर दबाब सिर्जना गर्दै आएका छन् । फास्ट ट्रयाक निर्माण दबाब संघर्ष समितिका संयोजक कुबेरबहादुर शाहीका अनुसार ११ जना नेतालाई दैनिक सयौं जनाले एउटै म्यासेज पठाएर दबाब सिर्जना गर्दै आएका हुन् ।

स्थानीयले नेताहरूलाई ‘धनगढी–दिपायल सडकखण्ड कहिले कालोपत्रे हुने ? के यी सडकखण्ड कालोपत्रे गर्र्ने लगायत एजेण्डा तपाईहरूको चुनावी नारा मात्रै हो ?’ भनेर गत बुधबारदेखि म्यासेज पठाएर दबाब सिर्जना गर्दै आएका छन् ।

प्रतिनिधिसभा सदस्य एंव नेकपा नेता लेखराज भट्ट, भीम रावल, नारदमुुनि राना, मुख्यमन्त्री त्रिलोचन भट्ट, प्रदेश अर्थ मन्त्री झपट बोहरा, सामाजिक विकास मन्त्री कृष्णराज सुुवेदी, भौतिक पूर्वाधार मन्त्री पठानसिंह बोहरा, सांसद डिल्लीराज पन्त, दीर्घ सोडारी, धनगढी उपमहानगरपालिकाका मेयर नृप वड, अत्तरिया नगरपालिकाका मेयर हरिसिंह साउँदलगायत नेतालाई म्यासेज पठाउँदै आएका छन् ।