धनगढी- बहुप्रतिष्ठित अत्तरिया-मोहना ६ लेन सडक आयोजनाको निर्माण अवधि आउँदो जेठ १० गते सकिँदैछ । तर हालसम्म ३० प्रतिशत मात्रै कार्यप्रगति देखिएको छ ।

आयोजना अन्तर्गत मोहना पुलदेखि अत्तरिया चोकसम्मको लम्बाई १४.२ किलोमिटर रहेको छ । जसको तीन चरणमा निर्माण भइरहेको छ । तर २ वर्षसम्ममा पनि आधा प्रगति नहुँदा स्थानीयबासीहरुलाई निकै सास्ती खेपिरहेका छन् ।

यसैबीच निर्माणमा देखिएको ढिला सुस्तीबारे प्रेस क्लब धनगढीले सडक आयोजना कार्यालयसहित सरोकारवाला निकायसँग आइतवार छलफल गरेको थियो । तर सरोकारवाला निकायले एक अर्कालाई दोष दिएर पन्छिएका छन् ।

आयोजना सूचना अधिकारी खगेन्द्रबहादुर सिंहले क्षेत्राधिकार खाली नहुनु, विद्युतका पोल सार्न ठेक्का प्रक्रियामा ढिलाइ हुनु, खानेपानीको पाइप लाइन नसारिनु र सडकमा परेका रुख कटानीमा भएको ढिलाइले आयोजनाको काममा शुरूदेखि ढिलाई भएको बताए । उनले आयोजना प्रमुखहरू फेरिइरहने हुँदा काम प्रभावित भएको उल्लेख गरे ।

सडकको बीच भागमा हालसम्म खानेपानीका पाइप लाइनहरु छन् । जसको व्यवस्थापन अझैसम्म हुन नसक्दा पनि निर्माणमा ढिलाई भएको छ । संस्थानका प्रमुख अरबिन्द कुमार कर्णले खानेपानीलाई वेवास्ता गरिएकाले काम नभएको आरोप लगाए ।

त्यस्तै, सडकखण्डमा हालसम्म विद्युतका पोलहरू हटाउने कार्य प्रभावकारी भएको छैन । तर नेपाल विद्युत प्राधिकरण धनगढी वितरण केन्द्रका प्रमुख धिरेन्द्र यादवले आफ्नो तर्फबाट कुनै अवरोध नभएको जिकिर गरे । पोल हटाउने कार्य जारी रहेको उनको भनाई थियो ।

१ अर्ब ६८ करोडको लागत रहेको आयोजना निर्माणको लागि ३ खण्डमा ठेक्का दिइएको छ । भन्सार रोडदेखि बोराडाँडीसम्म साढे ४ किलोमिटर पहिलो खण्डको प्रगति २४ प्रतिशत, बोराडाँडीदेखि मोहनपुरसम्मको साढे ४ किलोमिटरको दोस्रो खण्डमा सबैभन्दा कम साढे २३ प्रतिशत र मोहनपुरदेखि अत्तरियासम्मको ५.२ किलोमिटरको तेस्रो खण्डको प्रगति २५ प्रतिशत छ ।

समझौता सकिनै लाग्दा समेत कार्यप्रगति न्यून हुँदा आयोजनाको म्याद थपको प्रक्रिया थालिएको छ । सुरुमा काम गर्न नपाएकाले आयोजनाको अवधि डेढ वर्षसम्म थप गर्न माग गर्ने तयारीमा आयोजना कार्यालय र निर्माण कम्पनी लागेका छन् ।

आयोजनाको दोस्रो र तेस्रो खण्डको ठेक्का पाएको राजेन्द्र निर्माण सेवाका प्रमुख कार्यकारी अधिकृत रोशन भट्टले सडक क्षेत्रमा परेका घर हटाउन नहुने माग गर्दै स्थानीय सर्वोच्च अदालतमा पुगेपछि अदालतको आदेशमा करीब डेढ महिना काम गर्न नपाएको, दोस्रो र तेस्रो खण्डमा ४० प्रतिशत भौतिक प्रगति भएको दाबी गर्दै उनले निर्माण सम्पन्न हुन अझै १ देखि डेढ वर्षसम्म लाग्ने बताए ।

आयोजनाको पहिलो खण्ड निर्माणको ठेक्का शर्मा/अमर/नागार्जुन जेभीले पाएको छ । शर्मा/अमर/नागार्जुन जेभीका कार्यकारी प्रमुख विशेम्बर यादवले निर्माण सामग्री उत्खनन् गर्न नपाउँदा आफूहरु समस्यामा परेको बताए । उनले भने, ‘ठेकेदारको  समस्या कसैले बुझेको छैन । हामीलाई अवैध क्रसर उद्योग भन्दै क्रसर चलाउन दिएका छैनन्, जसले गर्दा आफूहरु चौतर्फी दबाबको सामना गरिरहेको उनको गुनासो थियो । निर्माण व्यवसायीले बर्षातको समयमा पनि नदीजन्य पदार्थ उत्खनन् गर्न पाउनुपर्ने समेत माग गरेका छन् ।

यसैबीच कैलालीका प्रमुख जिल्ला अधिकारी यज्ञराज बोहराले आयोजना निर्माणको लागि सबैसँग समन्वय गरेर जाने बताए । कैलाली निर्वाचन क्षेत्र नं. ५ का प्रतिनिधिसभा सदस्य नारदमुनि रानाले आफुले आयोजनालाई नजिकबाट हेरेको बताउँदै आयोजना प्रमुखको बहालीको लागि पहल गरिरहेको बताए । निर्माण व्यवसायीहरुको समस्या समाधान गर्न पनि सम्बन्धित निकायसँग छलफल गरिने रानाको भनाई थियो ।

३ पूलको टेन्डरै भएन

आयोजना अन्तर्गत ३ वटा पुल निर्माण हुने भएका छन् । धनगढीको मोहना नदी, गेटाको मनहरा खोला र सुमी नालामा पुल निर्माणको डिजाइन गरिएको छ । तर हालसम्म ती पुल निर्माणको टेण्डर आहृवान हुन बाँकी रहेको आयोजना कार्यालयले जनाएको छ ।

आयोजना प्रमुख टिक्दैनन्

आयोजना कार्यालयका प्रमुखको स्थायित्व नहुँदा पनि निर्माण कार्यमा गतिरोध उत्पन्न भएको छ । आयोजनाको झण्डै २ वर्षको अवधिमा ३ जना प्रमुख फेरिएर हाल आयोजना प्रमुखविहीन बनेको छ । आयोजना कार्यालयमा आएका नविनमान श्रेष्ठ निर्माण शुरू नहुँदै ३ महिनामै सरुवा भए । त्यसपछिका आयोजना प्रमुख मनिशकुमार शाह १ वर्ष बसेर सरुवा भए । पछिल्लो पटक आएका प्रमुख राजेशप्रसाद पौडेल ४ महिनामा सरुवा भएपछि हाल आयोजना कार्यालय प्रमुखविहीन बनेको हो ।

निर्माण कार्यले गति लिन नसक्दा हाल सो निर्माणाधीन सडक धुलाम्य भएको छ । जसले गर्दा आवतजावत गर्नेहरुले निकै सास्ती भोग्नु परेको छ भने सडक छेउछाउमा रहेका बासिन्दा पनि धूलोले हैरान भएका छन् । त्यस्तै, धुलो र निर्माण सामग्री जताततै थुप्रिदा स्थानीय व्यापारीहरुको व्यापार घाटा चुलिएको कैलाली उद्योग वाणिज्य संघका अध्यक्ष पुष्प कुवरले बताए ।