कैलालीमा नक्कली नोट छाप्ने गिरोह, नेपाल–भारत ‘कनेक्सन’

लखन चाैधरी
लखन चाैधरी

लखन चौधरी लोकान्तरका लागि सुदूरपश्चिम प्रदेश प्रतिनिधि हुन् । 

धनगढी – नेपाल–भारत सीमा जोडिएको जिल्लामा नक्कली नोटको कारोबारमा ठूलो गिरोह सक्रिय रहेको पाइएको छ ।

भारतसँग सीमा जोडिएको सुदूरपश्चिम प्रदेशको कैलाली र कञ्चनपुर जिल्लाको सीमावर्ती क्षेत्रमा  गिरोह सक्रिय रहेको प्रहरीको दाबी छ ।


Advertisement

हालसम्म पक्राउ पर्नेमा भारतीय र नेपाली नागरिक हुनु र ठूलो परिमाणमा नेपाली र भारतीय नक्कली नोट बरामद गरिनुले ठूलै गिरोह सक्रिय रहेको प्रहरीको दाबी छ । 


Advertisement

नक्कली नोट कारोबारमा नेपाल–भारत ‘कनेक्सन’ समेत भएको पुष्टि हुँदै आएको कैलालीका प्रहरी नायव उपरीक्षक दक्षकुमार बस्नेतले दाबी गरे । नियन्त्रणको लागि भारतीय प्रहरीसँग सहकार्य गरेर अनुसन्धान समेत गरिरहेको उनको बताए ।

प्रहरीले साउन महिनामा मात्रै नक्कली नोट छाप्ने मसिनसहित ७ जनालाई पक्राउ गरेको छ । शुक्रवार प्रहरीले धनगढी उपमहानगरपालिका–१ नैनादेवी टोलबाट नक्कली नोट छाप्ने मेसिनसहित पक्राउ परेका ४ जनालाई सार्वजनिक गरेको छ ।

पक्राउ पर्नेमा कैलालीको चुरे गाउँपालिका–१ का २५ वर्षीय खग्रेन्द्र बम भन्ने खगे्रन्द्र रजवार, चुरे गाउँपालिका–१ कै २२ वर्षीय भोजबहादुर बम, धनगढी उपमहानगरपालिका–३ का २४ वर्षीय पल्लभराज भट्ट र महोत्तरी जिल्लाको बर्दिवास नगरपालिका–६ का २५ वर्षीय गोकुल खड्का रहेका छन् ।

उनीहरूमध्ये ३ जनालाई फरक–फरक मितिमा धनगढीबाट पक्राउ गरिएको र गोकुल खड्कालाई सीआईबीको टोलीको सहयोगमा काठमाडौंबाट पक्राउ गरिएको प्रहरीले जनाएको छ ।

उनीहरूको साथबाट खोटा नोट छाप्ने १ मेसिन, नोट छाप्न प्रयोग भएको २ सय २० थान सेतो पेपर लगायतका नेपाली र भारतीय नक्कली नोट समेत बरामद गरिएको छ । 

प्रहरीले साउन ३ गते २ जना भारतीयलाई पनि नक्कली भारतीय रुपैयाँसहित पक्राउ गरेको थियो । भारतको लखिमपुर खिरीका श्रवणकुुमार सिंह र गुरुजित सिहलाई धनगढी क्षेत्रबाट ४० हजार ९ सय भारुसहित पक्राउ गरेको हो भने साउन १५ गते कैलारी गाउँपालिका–५ का छेदुराम डंगौरा चौधरीलाई नक्कली १ हजार नेपाली दरको २१ थान नोटसहित पक्राउ गरेको प्रहरीले जनाएको छ ।

कमेन्ट गर्नुहोस्