धनगढी – कैलालीको गौरीगंगा नगरपालिका–११ की माया विकको सामूहिक बलात्कार र हत्या मुद्दाको फैसलामा ढिलाइ भएको छ ।

घटनाको मुद्दा अन्तर्गतको ९ औं पटकको पेशी स्थगित भएपछि बल्ल जिल्ला अदालत कैलालीले मंगलवार वादी र प्रतिवादी पक्षका वकिललाई लिखित बहस नोट पेश गर्न आदेश जारी गरेको छ ।

जिल्ला अदालत कैलालीका न्यायाधीश कृष्णप्रसाद नेपालको एकल इजलालले सो आदेश जारी गरेको हो । अदालतको श्रेस्तेदार भुवन गिरीका अनुसार मंगलवार तोकिएको १० औंं पटकको पेशीको सुनुवाइ गर्दै  आदेश जारी गरेको बताए । मुद्दाको फैसला दशैंलगत्तै हुन सक्ने श्रेस्तेदार गिरीले बताए ।

गत वर्ष असार १२ गते कार्यालय जान घरबाट हिँडेकी विकको १५ गते गौरीगंगा नगरपालिका–११ कै चपथली सामुदायिक वनमा शव भेटिएको थियो । उनको सामूहिक बलात्कारपछि हत्या भएको थियो ।

बलात्कारमा संलग्न रहेको भन्दै प्रहरीले गौरीगंगा–११ का गणेश बडूवाल, मनोज बोगटी, सुरज चौधरी, भुवन खाती र दीपेन्द्र बोगटीलाई पक्राउ गरेको थियो । पाँचै जनाविरुद्ध कर्तव्य ज्यान, जबरजस्ती करणी र अपहरण अन्तर्गत मुद्दा चलिरहेको छ । हाल उनीहरू पुर्पक्षका लागि थुनामा रहेका छन् ।

घटना भएको १ वर्षभन्दा बढी समय बितेपनि फैसला नहुँदा पीडित परिवारले अन्याय भएको अनुभूति गरेका छन् । बलात्कारजस्तो निकै संवेदनशील मुद्दालाई चाँडै टुंगो लगाउनुपर्ने भएपनि पटक–पटक सरेको पेशीले पीडित परिवारमा निराशा छाएको हो । मायाका बुवा खडक विकले विभिन्न नाममा फैसला लम्ब्याएर आफूहरूलाई पीडामाथि पीडा थोपारिएको दुःखेसो सुनाए ।

हालसम्म प्रतिवादीका कानून व्यवसायी र सरकारी वकिलबाट ४/४ पटक र १ पटक इजलास नै नबसेर मुद्दाको पेशी सरेको जनाइएको छ ।

जिल्ला अदालत कैलालीले गरेको थुनछेक आदेशविरुद्ध प्रतिवादीका तर्फका कानून व्यवसायीले उच्च अलदातमा रिट दायर गरेपछि सुनुवाइमा ढिलाइ भएको अदालतका श्रेस्तेदार गिरीले बताए ।

मुद्दाको प्रकृति अनुसार निरन्तर चल्ने मुुद्दा भएपनि उच्च अदालतमा परेको रिटका कारण र प्रतिवादी वकिल धेरै भएको कारण मुद्दाको सुनुवाइमा ढिला भएको श्रेस्तेदार गिरीको भनाइ छ ।

कुनै पनि मुद्दाको किनारा जिल्ला अदालतले १ वर्षभित्रै टुंग्याउनुपर्ने कानूनी प्रावधान रहेको छ । सोही अनुसार माया विकको मुद्दाको असारभित्रै अन्तिम फैसला आउनुपर्ने हो । एउटा मुुद्दामा १ जना वकिलले २ पटकसम्म मात्रै पेशी सार्न पाउने प्रावधान रहेपनि प्रतिवादी वकिल ५ जना हुनु र वादी तर्फबाट पनि केही मिसिल अपुग हुँदा पेशी सारिएर फैसलामा ढिला हुन गएको श्रेस्तेदार गिरीले बताए ।

यौन सम्पर्क गर्न नमानेपछि सामूहिक बलात्कार !

गत वर्ष असार १२ गते गौरीगंगा नगरपालिकाको सामाजिक परिचालकमा कार्यरत विक कार्यालय जान भनेर घरबाट हिँडेकी थिइन् । कार्यालयबाट घर नफर्किंदा माया कहाँ गइन् भनेर परिवारजनले सोधखोज शुरू गरे । भोलिपल्ट पनि सम्पर्कमा नआएपछि परिवारका सदस्यले प्रहरीमा हराएको उजुरी गरे ।

असार १५ गते कैलालीको गौरीगंगा नगरपालिका–११ कै चपथली सामुदायिक वनमा उनको शव भेटियो । १ साता लामो प्रहरीको अनुसन्धानले उनको सामूहिक बलात्कारपछि हत्या भएको निष्कर्ष निकालेको थियो । 

युवती हत्याको मुख्य योजनाकार भन्दै ३० वर्षका गणेश बडूवाल, घटनामा संलग्न २७ वर्षका मनोज बोगटी, २१ वर्षका सुरज चौधरी, २० वर्षको भुवन खाती र १९ वर्षका दीपेन्द्र बोगटीलाई असार २२ गते प्रहरीले सार्वजनिक गरेको थियो ।

गत वर्ष अभियुक्त सार्वजनिक गर्दै कैलालीका तत्कालीन प्रहरी प्रमुख प्रहरी उपरीक्षक विनोद घिमिरेले ३ जनाले सामूहिक बलात्कारपछि हत्या गरेको बताएका थिए ।