काठमाडौं– यदि तपाईं शाकाहारी हुनुहुन्न भने पक्कैपनि दशैंमा मासु खाने योजना बनाउनुभएको वा खाँदै हुन सक्नुहुन्छ ।

तपाईंले दशैंमा केको मासु खाने सोच बनाउनु भएकोे वा खाँदै हुनुहुन्छ ? खसीबोका, च्याङ्ग्रा, कुखुरा, माछा आदि–आदि ।

तपाईंले खानको लागि छनौट गरेको मासु तपाईंको स्वास्थ्यका लागि कति स्वस्थकर छ, ख्याल गर्नुभएको छ ?

केको मासु खाने भन्ने कुरा सबै मानिसको आ–आफ्नो व्याक्तिगत रुचिको विषय हो । स्वाद, गन्ध र स्वास्थ्यका हिसाबले मानिसहरूले खसी, बोका, च्याङ्ग्रा, कुखुरा, बंगुर, रांगो, माछा आदिलाई आफ्नो रोजाइमा पार्छन् ।

केको मासु खाने भन्ने निर्णय स्वास्थ्य अवस्थालाई ख्याल गरेर लिनुपर्ने चिकित्सक बताउँछन् ।्

स्वाद र गन्धको हिसाबले मासु रोज्दा स्वास्थ्यमा प्रतिकुल असर पर्नसक्छ  ।

‘खासगरी बालबच्चा र पाको उमेर भएकाहरूलाई बोसो बढी भएको मासु राम्रो मानिँदैन, किनकी बोसो भएको मासु सानो उमेरका बालबालिकाले सजिलै पचाउन सक्दैनन्,’ वरिष्ठ होमियोचिकित्सक डाक्टर प्रेम नारायण श्रीवास्तवले भने ।

डाक्टर श्रीवास्तवका अनुसार ४० उमेर काटेपछि मानिसमा सुगर, प्रेसर जस्ता रोगहरू लाग्ने सम्भावना रहन्छ, त्यसैले बोसोयुक्त मासु नखानु राम्रो हुन्छ ।

पशु विभागमा कार्यरत डा. चन्द्र ढकालका अनुसार मासु खानका लागि खसीभन्दा बोका राम्रो र बोकाभन्दा पनि च्याङ्ग्रा राम्रो र स्वस्थकर हुन्छ । खसीको मासुमा अत्याधिक मात्रामा बोसो पाइन्छ, खसीको

तुलनामा बोकाको मासुमा कम मात्रामा बोसो हुन्छ । ‘खसीमा यौन उत्तेजना हुँदैन, तर बोकामा यौन उत्तेजना र सक्रियता बढी हुन्छ, जसका कारण बोकामा कम मात्रामा बोसो पाइन्छ,’ ढकालले भने ।

च्याङ्ग्रा हिमाली भेगमा मात्रै पाइने प्रजाति हो । सामान्यतया च्याङ्ग्राले  धेरै हिँडेर मात्रै आफ्नो आहारा पूर्ति गर्ने गर्छ । च्याङ्ग्राको शरीरले बढी मात्रामा शारीरिक अभ्यास गर्ने हुनाले उसको शरिरमा बोसोको मात्रा कम हुने पशु चिकित्सक ढकालको भनाइ छ । 

कम बोसो भएको मासु बालबालिकादेखि बुढापाकासम्मलाई हितकर हुने हुँदा च्याङ्ग्राको मासु तुलनात्मक रूपमा राम्रो र स्वास्थकर हुन्छ ।

कम बोसो भएको मासु बढी फाइबरयुक्त हुन्छ जसका कारण त्यस्तो मासु शरीरले सजिलै पचाउन सक्छ । खसीबोकाको तुलनामा च्याङ्ग्राको मासु कम बोसोयुक्त भएकोले बढी फाइबर पाइने पशु चिकित्सक डा. चन्द्र ढकालको भनाइ छ ।

मधुमेह, रक्तचाप र पायल्स भएका रोगीहरूले बोसो भएको मासु खान उपयुक्त मानिँदैन । सबै उमेर समूहका लागि र रोगीहरूका लागि पनि कम बोसो भएको च्याङ्ग्राको मासु तुलनात्मक रूपमा उपयुक्त हुने चिकित्सकहरू बताउँछन् ।