काठमाडौंमा जारी १३ औं दक्षिण एसियाली खेलकुद (साग) अन्तर्गत पुरुष फूटबलमा माल्दिभ्सलाई पराजित गर्दै नेपाल विजयी भएको छ । 

त्रिपुरेश्वरस्थित दशरथ रंगशालामा शनिवार भएको खेलमा नेपालले माल्दिभ्सलाई २–१ गोल अन्तरले पराजित गर्दै फाइनलमा पुग्ने सम्भावनालाई कायमै राखेको छ । यो जीतसँगै नेपाल ३ खेलमा ७ अंक जोड्दै लीग तालिकाको शीर्ष स्थानमा छ । 

माल्दिभ्सको स्वर्ण पदक जित्ने सम्भावना भने समाप्त भएको छ । ४ खेल खेलेको माल्दिभ्स २ अंक जोड्दै लीग तालिकाको अन्तिम स्थानमा छ । खेलमा शुरूआती अग्रता भने माल्दिभ्सले लिएको थियो ।

खेलको १८ औं मिनेटमा इब्राहिम महुदी हुसैनले गोल गर्दै माल्दिभ्सलाई १–० को अग्रता दिलाए ।

खेलको ४३ औं मिनेटमा नेपालका अभिषेक रिजालले १ गोल फर्काउँदै खेललाई १–१ गोलको बराबरीमा ल्याए । उनले पेनाल्टी क्षेत्रको ठीक बाहिर आएको बललाई नियन्त्रणमा लिँदै गोल गरेका थिए । त्यसपछि खेलको ५२ औं मिनेटमा नेपालले विजयी गोल गर्‍यो ।

सुनिल बलको कर्नरमा अनन्त तामाङले हेड गोल गर्दै नेपाललाई २–१ को जीत दिलाए ।