लेबनानमा महिनौंदेखि चलेको विरोध प्रदर्शनपछि नयाँ प्रधानमन्त्री र मन्त्रिपरिषद्को घोषणा गरिएको छ ।

प्राध्यापक तथा पूर्व शिक्षामन्त्री हसन दियाब नयाँ प्रधानमन्त्री बनेका हुन् । उनलाई हेज्बोल्लाह र उसको साझेदार फ्री पेट्रियोटिक मुभमेन्टको समर्थनमा नियुक्त गरिएको हो । 

प्रधानमन्त्री घोषित भएपछि दियाबले देशभरि भएका विरोध प्रदर्शनले देशलाई एकताबद्ध बनाएको र विभिन्न समूहबीचको काल्पनिक अवरोधलाई भत्काएको बताए ।

लगभग १०० दिनदेखि विरोधकर्ताहरूले भ्रष्टाचार र समूहमा विभाजित प्रणालीको विरोध गर्दै आएका छन् । मौजुदा प्रणालीका कारण राजनीतिक सम्भ्रान्तहरूले फाइदा उठाइरहेको आमधारणा छ । 

गत सप्ताहान्तमा भएका हिंस्रक विरोध प्रदर्शनमा सयौं मानिस घाइते भएका छन् । त्यसक्रममा प्रदर्शनकारीहरूले  पेट्रोल बम र ढुंगा प्रहार गरेका थिए भने सुरक्षाकर्मीहरूले अश्रूग्यास र पानीका फोहरा हानेका थिए । 

पूर्व प्रधानमन्त्री साद हरिरीले गत अक्टोबर २९ मा पदबाट राजीनामा दिएको भए पनि कामचलाउ प्रधानमन्त्री रहिरहेका थिए । 

अहिले प्रधानमन्त्री बनेका दियाब बेरुतस्थित अमेरिकन युनिभर्सिटीमा कम्प्युटर इन्जिनीयरिङका प्राध्यापक हुन् । 

दियाबको नेतृत्वमा विषयविज्ञ (टेक्नोक्रेट) हरूलाई मन्त्री बनाइएको छ र उनीहरूले राजनीतिक दलको प्रभावमा नरही काम गर्नेछन् । 

दियाबले मनत्रीहरूलाई देशको आर्थिक तथा मौद्रिक संकट हल गर्नका लागि भनिसकेका छन् । 

तर विरोध प्रदर्शन गरिरहेकाहरूले नयाँ सरकारको पनि विरोध गरिरहेका छन् । उनीहरूले राजनीतिक प्रणालीलाई पूरै उलटफेर गर्न, स्वतन्त्र तथा गैरसमूहगत मन्त्रिपरिषद् बनाउन र सरकारी भ्रष्टाचार अन्त्य गर्न माग गरिरहेका छन् । 

नयाँ प्रधानमन्त्री र मन्त्रीहरूलाई राजनीतिक सम्भ्रान्तहरूले नै छानेकाले ती स्वीकार्य नभएको विरोधकर्ताहरूले बताएका छन् ।