कोशी प्रदेशका प्रमुख पर्शुराम खापुङलाई विपक्षी दलहरूले रातारात विराटनगर ल्याएका छन् । मुख्यमन्त्री केदार कार्कीले राजीनामा नदिने अडान लिएपछि विपक्षीहरूले नयाँ सरकार गठनका लागि प्रदेश प्रमुख खापुङलाई रातारात विराटनगर ल्याएका हुन् । 

यसअघि पाँचथर पुगेका प्रदेश प्रमुख खापुङ बुधबार बिहानै विराटनगर आइपुगेका छन् । तीन/चार दिनअगाडि मात्रै उनी पाँचथरको फालेलुङमा धर्मगुरु फाल्गुनन्दको शालिक अनावरणका लागि गएका थिए । 

मुख्यमन्त्रीले राजीनामा नदिने भएपछि नेकपा एमालेले प्रदेश प्रमुखलाई विराटनगर आउन दबाब दिएको हो । मुख्यमन्त्री कार्कीले विश्वासको मत लिने समय मंगलबार सकिएको छ । उनले विश्वासको मत लिएनन् । 

प्रदेशसभाबाट विश्वासको मत लिने समयावधि मंगलबार रातको १२ बजे सकिएको छ । गत चैत २६ गते एमाले र नेकपा माओवादी केन्द्रका सांसदहरूले कार्की नेतृत्वको सरकारलाई दिएको समर्थन र विश्वासको मत फिर्ता लिएका थिए ।

संविधानको धारा १८८ को उपधारा २ अनुसार समर्थन फिर्ता लिएको ३० दिनभित्र मुख्यमन्त्री कार्कीले विश्वासको मत लिनुपर्ने भन्दै प्रदेशसभाले संकल्प प्रस्ताव नै पारित गरेको थियो ।

प्रदेशसभाको विशेष अधिवेशनबाट गत वैशाख ७ गते संकल्प प्रस्ताव पारित गर्दै मुख्यमन्त्रीलाई संविधानको धारा १८८ को उपधारा २ अनुसार विश्वासको मत लिन निर्देशन दिएको थियो । 

२०८० असोज २८ गते संविधानको धारा १६८ को उपधारा (५) अनुसार मुख्यमन्त्री बनेका कार्कीलाई एमालेका ३९ र काँग्रेसका ८ सांसदले समर्थन गरेका थिए । 

मुख्यमन्त्री कार्कीले सरकार अल्पमतमा रहेको भए पनि संविधानको धारा १६८ को उपधारा ५ अनुसार सरकार बनेकोले विश्वासको मत लिन नपर्ने जिकिर गर्दै आएका छन् । 

मुख्यमन्त्रीले विश्वासको मत नलिएपछि विपक्षीहरूले अहिले बैठक बोलाएका छन् । विराटनगरको एक होटलमा एमाले र माओवादीका नेताहरू बैठक बस्ने तयारी गरेको स्रोतले जनाएको छ । नयाँ रणनीति बनाउन बैठक बोलाइएको नेताहरूले बताएका छन् ।