गृहमन्त्री लामिछानेलाई पूर्वगृहमन्त्री रावलको प्रश्न– के मन्त्री र अरूका लागि फरक–फरक कानून छ ?

नेकपा (एमाले)का पूर्वउपाध्यक्ष डा भीम रावलले कान्तिपुर मिडिया ग्रुपका अध्यक्ष कैलाश सिरोहियाको गिरफ्तारी कानूनी राज्यको उपहास भएको बताएका छन् ।

पूर्वगृहमन्त्रीसमेत रहेका रावलले बुधबार सामाजिक सञ्जालमार्फत सिरोहियाको गिरफ्तारीको विरोध जनाउँदै मन्त्री र अरूका लागि फरक–फरक कानून भएको भन्दै प्रश्न उठाएका छन् ।

उनले उपप्रधान तथा गृहमन्त्री रवि लामिछानेसँग नेपालको कानूनविपरीत विदेशको समेत गरी दुई नागरिकता र राहदानी हुँदा केही कारबाही नगरिएको तर सिरोहियालाई दुईवटा नागरिकतामा ’विवरण फरक परेको’ आरोपमा कार्यकक्षबाटै पक्रिएको भन्दै आपत्ति जनाएका हुन्

‘गृहमन्त्री रवि लामिछानेसँग नेपालको कानूनविपरीत विदेशको समेत गरी दुई नागरिकता र राहादानी हुँदा केही कारबाही नगर्ने तर कैलाश सिरोहियालाई दुईटा नागरिकतामा ’विवरण फरक परेको’ भनी कार्यकक्षबाट पक्रेर रातारात धनुषा लिने !’, उनले एक्समा लेखेका छन्, ‘के मन्त्री र अरूका लागि फरक–फरक कानून छ ? कानूनी राज्यको उपहास !’

कान्तिपुर मिडिया ग्रुपका अध्यक्ष सिरोहियालाई नागरिकता कीर्ते गरेको आरोपमा प्रहरीले मंगलबार पक्राउ गरेको छ । 

गृहमन्त्री रवि लामिछानेसंग नेपालको कानून विपरीत विदेशको समेत गरी दुई नागरिकता र राहादानी हुँदा केही कार्वाई नगर्ने तर कैलाश सिरोहियालाई दुइटा नागरिकतामा 'विवरण फरक परेको'भनी कार्यकक्षबाट पक्रेर रातारात धनुषा लिने! के मन्त्री र अरूका लागि फरक-फरक कानून छ? कानूनी राज्यको उपहास!

— Bhim Rawal, PhD (@BhimRawal179) May 22, 2024