जनकपुरधाम - जनकपुरधाम उपमहानगरपालिकाकी उपप्रमुख रिता कुमारी मिश्रले विभिन्न उपसमितिको संयोजकको जिम्मेवारीमा अब नरहने भन्दै प्रमुख लाल किशोर साह समक्ष निवेदन दर्ता गराएकी छिन् । शुक्रवार उनले लिखित रुपमै निवेदन दर्ता गराएर एक्सन कमिटी, लामखुट्टे नियन्त्रण कमिटी र रंग पेन्ट वितरण कमिटीको संयोजक पदमा नरहने जानकारी गराएकी छिन् ।

जनकपुर शहरको सडक बिस्तारका क्रममा घरहरू भत्काउन तथा तोड-फोड गर्न उपमेयरको संयोजकत्वमा एक्सन कमिटी बनाइएको थियो । हालसम्म भएको तोडफोडका बारेमा आफूलाई जानकारी गराउने गरिएपनि पछिल्लो समयमा केही घरहरूको पर्खालसहित तोडफोड गर्दा आफूलाई कुनै जानकारी नै नदिई भत्काईएको उनले दाबी गरिन् ।

आफू एक्सन कमिटीको संयोजक रहेपनि आफूलाई जानकारी नै नगराएर तोड-फोड गरिँदा भोलि अदालतमा मुद्दा नै हाले आफू फस्न सक्ने हुनाले संयोजक पदमा नरहने गरी निवेदन दिएको उपप्रमुख मिश्रले बताइन् ।

शहरमा लामखुट्टे नियन्त्रणका लागि अहिले मोबिल छर्किने काम भई रहेको छ । 'तर त्यसमा पनि आफूलाई कुनै जानकारी नै गराइएको छैन, कति मोबिल वा कति औषधि वा कुन कुन ठाउँमा छर्किने काम भइरहेको छ त्यसबारे कुनै पनि जानकारी नै नगराइएकाले संयोजक पदमा नरहने भनेकी हुँ,' उपप्रमुख मिश्रले लोकान्तरसँग भनिन्, 'भोलि त्यसमा भ्रष्टाचार नै भए आफू पनि फस्ने हुनाले राजीनामा गरेको हो ।'

शहरमा घरहरू तोड-फोड हुँदा भत्किएका घरधनीको घरमा रंग पेन्ट गर्न रंग उपमहानगरपालिकाले निशुल्क वितरण गर्ने गरेको छ । 'उक्त कमिटिको संयोजक रहेपनि के कति जनालाई कति कति रंग वितरण गरियो त्यसबारे कुनै पनि जानकारी नै गराईएको छैन,' उनले थपिन्, 'भोलि त्यसमा अनियमितताको कुरा आयो भने आफूलाई पनि फसाउने काम हुन सक्ने देखेर राजीनामा गरेकी हुँ ।'

जनकपुर उपमहानगरपालिकाका प्रमुख लाल किशोर साह, प्रमुख प्रशासकीय अधिकृत सीता परियार र कमिटीमा रहेका वडाध्यक्षहरूको सिफारिसमा ती सबै काम भइरहेको उनले आरोप लगाईन् । 'म कमिटीमा संयोजक छु, तर मैले कहिल्यै बैठक नै बोलाएकी छैन तर पनि ती कमिटीहरुले आफैं खुशी काम गरेकाले पनि जिम्मेवारी बाट हटेको हो,' मिश्रले भनिन्, 'अनावश्यक रूपमा मेयर साहले हस्तक्षेप गर्दै आएकाले पनि हटेकी हुँ ।'

ति कमिटिको संयोजकमा कार्यपालिकाका अन्य कुनै सदस्यलाई दिन उनले भनेकी छिन् । जनकपुरधाम उपमहानगरपालिकामा मेयर साह र उपमेयर मिश्र दुवै एकै पार्टी राजपा नेपालबाट चुनाव जितेका हुन् । राजपा नेपालको कार्यपालिकामा बहुमत पनि छ । त्यसैले यस अघिसम्म प्रमुख र उपप्रमुखबीच समन्वय रहँदै आएको भएपनि अहिले आएर दुवै जनाबीच मनमुटाव बढेको देखिएको छ । अब प्रमुख साहले उनलाई ति कमिटीको जिम्मेवारीबाट मुक्त गर्छन वा गर्दैनन् त्यो हेर्नुपर्ने हुन्छ ।