सुर्खेत । कर्णाली प्रदेशका भूमि, व्यवस्था, कृषि तथा सहकारी मन्त्रालयले हेलो किसान सरकार टोल फ्री नम्बर सञ्चालनमा ल्याएको साउन ६ गते ६ महिना पुग्दैछ । 
आधा वर्षको अवधिमा जम्मा ४ ओटा मात्रै गुनासा आएका छन् । सरकार सञ्चालन भएको एक बर्षको अवसरमा तामझामका साथ २०७५ फागुन ६ गते मन्त्री विमला केसीले दैलेख डुङ्गेश्वर गाउँपालिका वडा नम्वर २ का पूर्वबहादुर थापा र सुर्खेत वीरेन्द्रनगर नगरपालिकाका मुरारी जंङ किसानका समस्याहरु लिएर उक्त सेवा सञ्चालनमा ल्याएकी थिइन् । 

उनीहरुले मन्त्रीलाई फोन मार्फत आफ्नो समस्याहरु बताएका थिए भने मन्त्री केसीले ती समस्याहरुको समाधान गर्ने आश्वासन दिएकी थिइन् । कार्यक्रम सुरु गरेको ६ महिना पुग्न लाग्दा पनि ६ वटा जति पनि उजुरी नआएको पाइएको छ । कार्यक्रम नै कोमामा गएको अवस्था छ ।
६ महिनामा कति जनाले कस्तो समस्या ल्याए र समाधानको अवस्था के छ भन्ने बारे मन्त्रालयका कर्मचारी बताउनै सक्दैनन् । सानो कोठा अनि  थोत्रो कम्प्युटर र एक थान टेलिफोन राखेर सञ्चालनमा ल्याइएको उक्त कार्यक्रम अहिले वेवारिशे अवस्थामा पुगेको छ । यसतर्फ मन्त्रालयका कर्मचारीको ध्यान पुग्न सकेको छैन ।
उक्त कार्यकक्षमा अहिले सुब्बा पदमा एक कर्मचारी बस्छिन् । उनलाई हेलो किसान सरकार कार्यक्रमका बारेमा केहि पनि जानकारी नै छैन । उनको काम दर्ता र चलानी गर्ने मात्रै हो । 

पशुपंक्षी विकास शाखाका पशु चिकित्सक दीपक भण्डारीले अहिलेसम्म भेटेनरी सेवाबारे दुई वटा प्राविधिक समस्या मात्रै आएको बताउँदै आफूहरुले सल्लाह दिइ समाधान गरेको बताए । ‘सल्यान देखि कुखुरामा रोग लागेको र राहत विनियोजन नभएको गुनासो आएको थियो’ उनले भने, ‘मन्त्रालयमा राहतको कार्यक्रम नभएको तथा कुखुरामा लागेको रोगको निदानबारे सल्लाह दिएका थियौं । यो बाहेक अन्य गुनासा तथा उजुरी आएको मलाई याद छैन ।’

उसो त कर्णाली प्रदेश सरकारको हेलो मुख्यमन्त्री कार्यक्रम पनि कोमामा पुगिसकेको छ । गुनासाहरु आउन छोडेका छन् । सुरु सुरुमा सरकारलाई गुनासा आएपछि प्रदेश सरकारले समाधान गर्न नसकेका कारण अहिले त्यहाँ गुनासा आउनै छोडेका हुन् ।
किसानका समस्या समाधान गर्ने र उनीहरुको राय सुझाव अनुरुप अघि बढी कृषिमा आत्मनिर्भर प्रदेश बनाउने भन्दै मन्त्रालयले टोल फ्री नम्बर सार्वजनिक गरेको थियो । पैसा नलाग्ने नम्बर १६६०८३५२०१२ सार्वजनिक गर्दै मन्त्री केसीले मन्त्रालयका सबै गुनासा सम्वोधन गर्ने बताएकी थिइन् ।

तर कर्मचारीको लापवाहीका कारण उक्त कार्यक्रम कोमामै पुगेको छ । ‘टोल फ्रि नम्बरको प्रचार प्रसार गर्ने, विज्ञापन गर्ने काम भएन’ मन्त्रालयका एक कर्मचारीले भने, ‘जसलाई मन्त्रीले जिम्मा दिनुभएको थियो, उहाँले पुरै वेवास्ता गर्नुभो ।’ उनका अनुसार मन्त्रीले बारम्बार निर्देशन आफूहरुकै सामुन्ने दिएको ती कर्मचारीको दाबी छ ।
मन्त्रालयका उपसचिव हरि पण्डितले दशैं भन्दा पहिले नै व्यवस्थित गरिसक्ने दाबी गरे । ‘कर्मचारी नहुँदा हामीलाई समस्या भएको थियो । अहिले नयाँ कर्मचारी आउने र कोही आइसकेका छन्’ उनले भने, ‘हामीले प्रभावकारी रुपमा कार्यक्रम सञ्चालन गर्न नसकेको साँचो हो ।’ अहिले सबैको हातमा मोबाइल हुने र सोझै सूचना अधिकारी, सचिव वा मन्त्रीलाई गुनासा पोख्ने चलन बढेका कारण पनि कम गुनासा आएको हुनसक्ने उनको भनाई छ ।