नेपाल–भारत सीमानाका बेलहियामा अलपत्र परेका नेपालीलाई प्रवेश अनुमति दिइएको छ ।

सरकारले नेपाल प्रवेश गर्न अनुमति दिएपछि फाराम भर्न लगाएर सबैलाई प्रहरीले नेपाल प्रवेश गर्न दिएको हो  तर उनीहरू क्वारेन्टाइनमा नराखेर सिधै घर जान दिइएको छ ।

जिल्ला प्रहरी कार्यालय रुपन्देहीका डीएसपी तथा प्रवक्ता खड्गबहादुर खत्रीले नाकामा रोकिएका ६०० नेपालीलाई नाम, ठेगाना र मोबाइल नम्बर सहितको फर्म भराएर घर जान दिइएको लोकान्तरलाई जानकारी दिए ।

उनले भने, ‘बिहान १० बजेदेखि रोकिएकाहरूलाई राति ८ बजेसम्म फर्म भराएर घर जान दिइयो । क्वारेन्टाइममा पठाइएन । उनीहरू गुल्मी, पाल्पा, अर्घाखाँची, पोखरा र बाग्लुङका रहेछन् ।’ 

नेपालीलाई नाकामा रहेको हेल्थ डेक्समा स्वास्थ्य परीक्षण गराएर नेपाल प्रवेश गर्न दिइएको छ । भारतबाट नेपाल प्रवेश गर्नलाई क्वारेन्टाइनमा नराखी सिधै घर जान दिँदा गाउँमा कोरोना भाइरसको जोखिम बढेको छ । सोमवार बिहान १० बजे अगाडिसम्म मात्रै  ८१५ जना नेपाल प्रवेश गरेका थिए ।

आइतवार ४ हजार र शनिवार १७ हजार नेपाली भारतका विभिन्न क्षेत्रबाट घर फर्किका थिए । भारतमा कोरोना संक्रमणको दर बढ्दै जाँदा भारतका विभिन्न शहरबाट नेपाल आउनेमा कोरोनाको जोखिम उच्च हुनसक्छ ।

प्रहरीले अहिले सीमा नाकामा कडाइ गरेको छ । अहिले नाकाबाट मालबाहक र इन्धनका गाडीबाहेक अन्य मानिस र गाडी ठप्प राखिएको छ । खत्रीले सीमामा र जिल्लामा उच्च सुरक्षा सतर्कता अपनाइएको बताए ।
बुटवल बजारमा अहिले सुनसान छ । गाडी ठप्प छन् । बजार बन्द छ ।