छिमेकी जिल्ला बाँकेमा कोरोनासंक्रमण भएको भन्ने खबर आइरहँदा भेरीगंगा नगरपालिका छिन्चुमा १४ दिन क्वारेन्टाइन बसेकालाई आरडीटी जाँच नगरिकनै घर पठाइएको छ ।

वैशाख ६ गते सिन्धुपाल्चोक, गोरा, कोहलपुर भएर आएका ती नौ जनामा एक जनाको मात्रै जाँच गरिएको र अन्यको जाँच नै नगरी घर पठाइएको हो ।

‘कम्तिमा क्वारेन्टाइनमा बसेकालाई आरडीटी जाँच गरेर घर पठाउनुपर्नेमा त्यस्तो गरिएन,’ स्रोतले भन्यो, ‘उनीहरू १४ दिन क्वारेन्टाइनमा बसेपछि घर पठाइएका हुन् । यसरी जाँजविनै गाउँ पठाउनु झन जोखिम हुने देखियो ।’

भेरी गंगा नगरपालिकाका स्वास्थ्य संयोजक राजेश बुढाले किट अभाव भएका कारण एक जनाको जाँच गरेर नौ जनालाई घर पठाइएको बताए । 

‘२२२ जना अहिले क्वारेन्टाइनमा बसिरहेका छन्, ९ जना आज छाडेका छौं । बाँकी २१३ जनालाई वैशाख ३० गतेसम्म छाड्ने तयारी छ । छिन्चु, लादे र झिग्नेमा अहिले क्वारेन्टाइन निर्माण गरिएको छ,’ उनले भने, ‘हामीलाई ५४ वटा मात्रै आरडीटी जाँच किट दिइएको थियो । सबैलाई जाँच्न यसले सम्भव नै भएन ।’

आफूले जिल्ला स्वास्थ्य कार्यालय, प्रदेशको सामाजिक विकास मन्त्रालयमा पर्याप्त किट दिन माग गरेपनि नपाइएका कारण उनीहरूलाई जाँचविनै पठाइएको बताए । उनले प्रदेश बाहिरबाट किट मगाउन खोजेपनि सम्भव नभएको बताए ।

जिल्ला स्वास्थ्य सेवा कार्यालयका प्रमुख चेतननिधि वाग्लेले सुर्खेतमा १४८८ जना क्वारेन्टाइनमा रहेको बताउँदै उनीहरूमध्ये केही व्यक्तिको मात्रै आरडीटी जाँच गरिँदै आएको बताए ।

‘अहिले हामीसँग ३ सय जति मात्र किट छ । काठमाडौंमा पनि किट अभाव भएको अवस्था छ,’ उनले भने, ‘जोखिम लेखाजोखा गर्दा समेत उहाँहरूमा कुनैपनि लक्षण नदेखिएको, रुघा ज्वरो नदेखिएकाले उहाँहरूलाई घर पठाइएको हो । शंकास्पद् भएको खण्डमा पीसीआर नै जाँच गर्ने भनेका छौं ।'

उनले भारतबाट आएका वा अन्य देशबाट आएका नागरिकको आरडीटी जाँच गरिसकेको बताउँदै शंका लागेको खण्डमा मात्रै जाँच गर्ने गरिएको बताए ।