सर्लाहीको रामनगर बहुअर्वा गाउँपालिका–७ का १५ जनामा कोरोना भाइरस संक्रमण पाइएको छ ।

स्वास्थ्य तथा जनसंख्या मन्त्रालयका सहप्रवक्ता डा. समिरकुमार अधिकारीका अनुसार गाउँपालिकाका १ महिला र १४ जना पुरुष गरी १५ जनामा कोरोना ‘पोजेटिभ’ पाइएको छ ।

गाउँमा २२, २२, २४, २५, २५, २७, ३२, ३४, ३४, ३५, ३८, ३८, ३९ वर्षीय पुरुष र १८ वर्षीया महिलामा संक्रमित रहेको मन्त्रालयले पुष्टि गरेको छ ।

संक्रमित १५ जनामध्ये १४ जना पुरुष सिसौटका रहेपनि महिला भने आफ्नो गाउँको नरहेको ७ नम्बर वडाका वडाध्यक्ष रामसोगारथ साह तेलीले बताए । तेलीका अनुसार संक्रमित १४ जना पुरुषमध्ये १३ जना भारतको मुम्बईबाट र १ जना दिल्लीबाट आएका हुन् ।

जेठ ७ गते ११ जना, जेठ ५ गते १ जना र जेठ ४ गते २ जना भारतबाट आएका उनले बताए । भारतबाट आएका संक्रमितहरू घर नगएर सिधा क्वारेन्टाइनमा गएको उनले बताए । गाउँपालिकाको ४ नम्बर वडाको तपसी माविमा क्वारेन्टाइन सञ्चालित रहेको उनले बताए ।