कार्यादेशमा सहमति जुटाउन बसेको कार्यदलको बैठक निष्कर्षविहीन टुंगियो

सहकारी ठगी प्रकरणबारे छानबिन गर्न गठन गरिने संसदीय समितिको कार्यादेश (टीओआर) टुंगो लगाउन बसेको कार्यदलको बैठक निष्कर्षविहीन टुंगिएको छ ।

कानून, न्याय तथा संसदीय मामिला मन्त्रालयमा बिहीबार बसेको बैठकमा सहमति जुट्न नसकेपछि बिनानिष्कर्ष टुंगिएको प्रमुख प्रतिपक्षी दल नेपाली कांग्रेसका सहमहामन्त्री जीवन परियारले जानकारी दिए ।

सत्तापक्ष सहकारीको नाम राख्न सहमत भएपनि उपप्रधान तथा गृहमन्त्री रवि लामिछानेको नाममा असहमत भएकाले बैठक निष्कर्षमा पुग्न नसकेको उनको भनाइ छ ।

नेकपा (एमाले)का प्रमुख सचेतक महेश बर्तौलाले भने कार्यदलको बैठक फेरि शुक्रबार बिहान साढे ८ बजे बस्ने र त्यसले निष्कर्ष निकाल्ने दाबी गरे । गृहमन्त्री लामिछानेलाई शुरूमै दोषी देखाउने प्रवृत्ति कांग्रेसमा देखिएकाले बिहीबार सहमति जुट्न नसकेको उनले बताए । 

‘गृहमन्त्रीको नामै राखेर छानबिन गर्नुपर्छ भन्नुभयो । छानबिनभन्दा पहिले नै व्यक्तिको नाम किटान गर्नुहुँदैन भन्ने हाम्रो अडान रह्यो,’ बैठकपछि उनले भने । 

कार्यदलमा सरकारको तर्फबाट कानूनमन्त्री पदम गिरी र एमालेको तर्फबाट प्रमुख सचेतक महेश बर्तौला, प्रमुख प्रतिपक्षी नेपाली कांग्रेसका सहमहामन्त्री जीवन परियार र राष्ट्रिय स्वतन्त्र पार्टी (रास्वपा)का सांसद शिशिर खनाल थिए ।

यस्तै कांग्रेस नेता ज्ञानेन्द्र कार्की पनि सहभागी थिए ।

कांग्रेसले गृहमन्त्री रवि लामिछानेको नाम उल्लेख गरी उनी मुछिएको सहकारी संस्थामा पनि संसदीय समितिले छानबिन गर्नुपर्ने अडान राख्दै आएको छ । यसैमा सहमति जुट्न नसकेको हो ।