एकजना मान्छेको नागरिकता छानबिन गर्दा प्रेस स्वतन्त्रता हनन् हुँदैन– ओली

सत्तारुढ दल नेकपा (एमाले)का अध्यक्ष केपी शर्मा ओलीले एकजना मान्छेको नागरिकताको विषय छानबिन गर्दा प्रेस स्वतन्त्रता हनन् नहुने प्रतिक्रिया दिएका छन् । 

विराटनगरमा बिहीबार साँझ एमालेको मोरङ जिल्ला कार्यालयमा सञ्चारकर्मीसँगको कुराकानीमा उनले कान्तिपुर मिडिया ग्रुपका अध्यक्ष कैलाश सिरोहियाको गिरफ्तारी प्रेससँग सम्बन्धित विषय नभएको स्पष्ट पारेका हुन् ।

पूर्वप्रधानमन्त्रीसमेत रहेका ओलीले नक्कली नागरिकताका विषयमा छलफल गर्दा प्रेस स्वतन्त्रता हनन् भएको भनेर प्रमुख प्रतिपक्षी दल नेपाली कांग्रेसले बाङ्गो–टिङ्गो खेल खेलेको आरोप लगाए ।

‘सबै कुरालाई कांग्रेसले बाङ्गो–टिङ्गो बनाएर उचालेको छ,’ उनले भने,  ‘यसले केही अर्थ राख्दैन ।’

उपप्रधानमन्त्री तथा गृहमन्त्री रवि लामिछानेले इगो साँधेकोजस्तो देखिन्छ नि ? भन्ने प्रश्नमा उनले देख्दा त्यस्तो देखिएको भएपनि गृहमन्त्रीले आफ्नो कर्तव्यस्वरुप कारबाहीलाई अगाडि बढाएको जवाफ दिए ।

कान्तिपुर मिडिया ग्रुपका अध्यक्ष सिरोहियालाई नागरिकता कीर्ते गरेको आरोपमा प्रहरीले मंगलबार कार्यकक्षबाटै पक्राउ गरेको थियो ।