बालुवाटारमा मन्त्रिपरिषद् बैठक जारी, केही मन्त्रालय फुटाउने तयारी

फाइल तस्वीर

नेकपाभित्र मन्त्रिपरिषद् पुनर्गठनको चर्चा चलिरहेको समयमा नेपाल सरकार कन्त्रिपरिषद्को बैठक बालुवाटारमा शुरु भएको छ । प्रधानमन्त्री निवास बालुवाटारमा जारी बैठकमा केही मन्त्रालय फुटाउने विषयमा छलफल भएको स्रोतले दाबी गरेको छ ।

सत्तारूढ दल नेकपाको स्थायी कमिटी र सचिवालय बैठकको निर्णयअनुसार प्रधानमन्त्री केपी शर्मा ओलीले मन्त्रिपरिषद् पुनर्गठनको गृहकार्य गरिरहेका छन् ।


Advertisement

नेकपा उच्च स्रोतले आजभोलिमै मन्त्रिपरिषद् पुनर्गठन हुने सम्भावना रहेको बतायो । कम्तिमा ८ जना मन्त्रीहरू फेरिने सम्भावना छ ।

मन्त्रिपरिषद् पुनर्गठन अघि नेकपाका अध्यक्षद्वय ओली र पुष्पकमल दाहाल प्रचण्डबीच आइतवार पनि छलफल भएको थियो । सचिवालय बैठकले मन्त्रिपरिषद् पुनर्गठनको अधिकार अध्यक्षद्वयलाई दिएको थियो ।


Advertisement

रेल र पानीजहाज मन्त्रालयथपिने

सरकारले जल र स्थल यातायातको समन्वय गर्नेगरी रेल र पानीजहाज मन्त्रालय स्थापना गर्ने तयारी गरेको छ । मन्त्रिपरिष्द पुनर्गठनमा रेल र पानीजहाज मन्त्रालय बनाउने गरी तयारी भइरहेको नेकपा स्रोतले बतायो ।

अहिले भौतिक पूर्वाधार तथा यातायात मन्त्रालय अन्तरगत रेल र पानीजहाज कार्यालय छन् । भौतिक पूर्वाधारबाट यातायातलाई अलग गरेर नयाँ मन्त्रालय स्थापनाको तयारी भइरहेको स्रोतले बतायो ।

‘रेल र पानीजहाज मन्त्रालय स्थापना गर्ने मोटामोटी सहमति भइसकेको छ, मन्त्रिपरिषद्ले यसको निर्णय गर्ला,’ स्रोतले लोकान्तरसँग भन्यो ।

समुन्द्रमा नेपाली ध्वजाबहाक पानीजहाज चलाउने प्रधानमन्त्री केपी शर्मा ओलीको योजना छ । ओलीले मिति नै तोकेर पानीजहाज चल्ने संसदबाट घोषणा गरेका थिए । सरकारले दुई वर्षअघि नै ललितपुरमा पानीजहाज कार्यालयसमेत स्थापना गरेको छ ।

पूर्वपश्चिम रेल सञ्चालन गर्ने नेकपाको चुनावी घोषणा पत्र र सरकारको नीति तथा कार्यक्रममा उल्लेख छ । सोही घोषणालाई कार्यान्वयनमा ल्याउन रेल र पानीजहाज मन्त्रालय स्थापना गर्न लागिएको स्रोतले बतायो ।

 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्