नेपालमा कोरोनाभाइरस र लकडाउका कारण बन्द गरिएका फिल्म हल खुलेका छन् ।

नेपालभरका १ सय ९३ हलमध्ये १ सयभन्दा धेरै मल्टिप्लेक्स तथा सिंगल थिएटरले दर्शकका लागि ढोका खुला गरेका छन् । तथापि, दर्शकको संख्या असाध्यै पातलो देखिएको छ ।

पुस १० शुक्रवारदेखि चलचित्र संघको आह्वानमा सिनेमा हल खुलेका हुन् । तर, सरकारले भने आधिकारिक रूपमा अझै हलमा फिल्म लगाउन अनुमति दिएको छैन । तर, हल खुलेपनि सरकारका तर्फबाट भने कुनै रोकतोक गरिएको छैन ।

९ महिनापछि खुलेका हलमा लकडाउनअघि प्रदर्शन भएका चलचित्र आमा, सेन्टी भाइरस तथा हलिउड चलचित्र द इन्भिजिबल म्यान र ब्लड शट प्रदर्शन गरिएका छन् ।

विगतमा शुक्रवार, शनिवार तथा नयाँ वर्ष सबैभन्दा धेरै कारोवार हुने समय हो ।

रेष्टुरेन्ट, सपिङ मल तथा सार्वजनिक स्थलहरूमा भीडभाड बढ्दै गएपनि हलमा हलमा दर्शकको संख्या निकै न्यून छ ।

क्युएफएक्सका अनुसार सबैभन्दा धेरै दर्शक २५ जनासम्म आएका छन् । यो ललितपुरस्थित लबिम मलको तथ्यांक हो । 

बाँकी अधिकांश हल खाली छन् । कतिपयमा १० जनासम्म दर्शक आएको क्युएफएक्सले जनाएको छ ।

चलचित्र संघका अध्यक्ष मधुसुधन प्रधानले नौ महिनादेखि बन्द रहेका हल खोलेपछि विस्तारै चलायमान हुने र दर्शक आउने अपेक्षा रहेको बताए ।

अहिले समग्र चलचित्रकर्मी पर्ख र हेरको अवस्थामा छन्, उनले थपे, ‘अझै केही समय यस्तै हो, विस्तारै दर्शक आउँछन् ।’

हल त खुला भएको छ । तर, दर्शक देखेर निर्माताहरू भने डराएका छन् । यो स्थितिमा कसरी चलचित्र प्रदर्शन गर्न सकिन्छ ? निर्माता सन्तोष सेन भन्छन्, ‘हल खचाखच नभएसम्म म लगायत नयाँ फिल्मका निर्माताहरू सहमत हुन्छन् जस्तो मलाई लाग्दैन ।’

उनले लगानी उठ्ने सम्भावना नभएसम्म हलमा चलचित्र लगाउन सक्ने अवस्था नरहेको बताए ।

निर्माता तथा निर्देशक अशोक शर्माले उद्योग चलायमान गराउनका लागि दर्शक नआएपनि हल खोल्नुपर्ने बताउँछन् । 

उनले भने, ‘नयाँ फिल्म अहिल्यै आउँछन् भन्ने हामीलाई लागेको थिएन । बिस्तारै दर्शकले हल सुरक्षित भएको महसूस गर्नासाथ हलमा दर्शक आउने अपेक्षा गरिएको छ ।’

निर्माता संघका अध्यक्ष आकाश अधिकारीले हल खुलेकै दिन दर्शकले भरिभराउ हुन्छ भन्ने अपेक्षा नभएको तर्क गर्दै स्वयं निर्माताले जोखिम मोलेर मात्रै हलमा केही समय फिल्म देखाउनुपर्ने बताए । 

उनले भने, ‘मैले पहिलेदेखि भन्दै आएको हो, पुराना चलचित्र लगाउँदा ठीक होला । नयाँ निर्माताले करोडौं जोखिम मोलेर फिल्म लगाउँछन् जस्तो मलाई लाग्दैन ।’

क्युएफएक्सका विभिन्न शाखामा कतिपयमा ५ देखि कतिपयमा २५ जनासम्म दर्शक आएका छन् । तर, यति दर्शकले हलको बिजुलीको बिल तिर्न समेत नपुग्ने हल सञ्चालक बताउँछन् ।

ठूला फिल्म निर्माताले आफ्ना फिल्म रिलिज मिति अझै तय गरेका छैनन्, किनकि, उनीहरूले आफ्नो चलचित्रको लगानी उठ्ने सम्भावना नभएसम्म नयाँ फिल्म लगाउने सम्भावना छैन ।

क्युएफएक्सका प्रमुख कार्यकारी अधिकृत रोशन अडिगाले  व्यापारिक हिसाबले भन्दा पनि चलचित्र उद्योगको भविष्य र उद्योग चलायमान गराउनका लागि हल खुला गरिएको बताए ।

‘हलमा सुरक्षित तरिकाले दर्शकका लागि फिल्म देखाउने वातावरण बनाएका छौं,’ उनले भने, ‘नयाँ फिल्म नभएसम्म दर्शकको भीड बढ्छ जस्तो लाग्दैन ।

दर्शक तान्नका लागि नयाँ फिल्म अनिवार्य छ । तर, नयाँ फिल्मका निर्माताहरूले यो परिस्थितिमा फिल्म लगाउँछन् जस्तो देखिएको छैन ।’ ​

तथापि, ती निर्माताहरूसँग यस विषयमा गम्भीर ढगंले कुराकानी भइरहेको उनको भनाइ छ ।

चलचित्र उद्योगका जानकारहरूले नयाँ चलचित्र नभएसम्म दर्शकले जोखिम मोलेर फिल्म हेर्न जाने सम्भावना निकै कम रहेको बताउने गरेका छन् ।