मुलुकका विभिन्न ५० ठाउँमा विद्युतीय सवारी साधनको चार्जिङ स्टेसन बनाउने प्रक्रिया अन्तिम चरणमा पुगेको छ ।

करीब १ करोड रुपैयाँ लागत अनुमान गरिएको सो योजना अबको केही महिनामा नै सकिने नेपाल विद्युत् प्राधिकरणले दाबी गरेको छ ।

प्रक्रिया अन्तिम चरणमा पुगेको भन्दै अबको साढे १ महिनाभित्रमा काम शुरू हुने नेपाल विद्युत् प्राधिकरणका प्रवक्ता मदन तिम्सिनाले लोकान्तरलाई बताए । 

सरकारले विद्युतीय सवारी साधनको प्रयोगलाई बढावा दिनुपर्ने बताउँदै आएका बेलामा नेपाल विद्युत प्राधिकरणले मुलुकभर ५० ठाउँमा चार्जिङ स्टेसन बनाउने जिम्मा लिएको थियो । 

प्राधिकरणका अनुसार, अहिले प्राविधिक रिपोर्ट (टेक्निकल बीड इभ्यालुएसन)को काम सकिएको छ । 

प्राविधिक रिपोर्टको काम सकिएसँगै एसियाली विकास बैंक (एडीबी) ले यसको रिभ्यु गर्दैछ । 

प्रवक्ता तिम्सिनाले लोकान्तरसँग भने, ‘हामीले रिपोर्ट पठाइसकेका छौं, एडीबीले १ हप्ताभित्रमा रिभ्यु पठाउनेछ ।’

प्राधिकरणले रिर्पोट मंसिर २८ गते एडीबीलाई सो रिपोर्ट पठाएको थियो । 

‘एडीबीले सहमति दिएसँगै टेन्डर सम्झौता गर्छौं र हामी फिल्डमा जान्छौं,’ तिम्सिनाले भने । 

१३ कम्पनीबीच प्रतिस्पर्धा 

चार्जिङ स्टेसन निर्माणका लागि प्राधिकरणले गत वर्ष २०७६ माघ ९ गते टेन्डर आह्वान गरेको थियो । 

प्राधिकरणले मुख्यमुख्य सडक तथा राजमार्गमा जोडिएका व्यापारिक भवन, सुपरमार्केट, सिनेमा हल, पार्क, सरकारी निकाय लगायत स्थानमा ५० वटा चार्जिङ स्टेसन बनाउन टेन्डर आह्वान गरेको थियो । 

०७६ फागुन २३ गतेसम्म टेन्डरमा सहभागी हुनुपर्ने गरी आह्वान गरिएको टेन्डरमा विभिन्न मुलुकबाट १३ कम्पनीले इच्छा देखाएका छन् । 

जसमा धेरैजसो कम्पनी चीनका रहेका छन् भने भारत, रसिया, बंगलादेश, स्विट्जरल्याण्ड लगायतका मुलुकका कम्पनीले इच्छा देखाएको प्राधिकरणले जनाएको छ । 

प्राधिकरणले टेन्डर मूल्यांकनका लागि बढीमा तीन महिना राख्ने र एक वर्षभित्रमा चार्जिङ स्टेसन बनाइसक्ने लक्ष्य राखेको थियो ।

यद्यपि टेन्डर खुलेको मितिले ११ महिनासम्म पनि काम अगाडि बढ्न सकेको छैन । 

कोरोना महामारीले काम रोकियो !

समयमै काम सक्ने लक्ष्य राखिएपनि विश्वव्यापी रूपमा फैलिएको कोरोनाभाइरस (कोभिड–१९)को महामारीका कारण काममा बाधा आएको प्राधिकरणले बताएको छ । 

कोरोना महामारीका कारण अन्तर्राष्ट्रिय उडानहरू रोकिएसँगै काममा अवरोध आएको प्रवक्ता तिम्सिना बताउँछन् । 

उनले भने, ‘एडीबीले अन्तर्राष्ट्रिय उडान नखुल्दासम्म ठेक्का प्रक्रिया नगर्नु भन्ने कुरा भयो । त्यसपछि काम रोकिएको हो ।’

अब अन्तर्राष्ट्रिय उडान नियमित भइसकेको अवस्थामा प्रक्रियागत कामहरू एक महिनाभित्रै सकिने र त्यसपछि काम अगाडि बढ्ने उनको भनाइ छ । 

उनका अनुसार अबको ५ देखि ६ महिनाभित्रमा मुलुकका विभिन्न ५० स्थानमा विद्युतीय सवारी साधनका लागि चार्जिङ स्टेसन खडा हुनेछन् । 

उनले भने, ‘काम धेरै छैन, अबको ५/६ महिनाभित्रैमा काम सकिन्छ भन्नेमा हामी ढुक्क छौं ।’

कसरी हुन्छ स्टेसनको व्यवस्थापन ? 

चार्जिङ स्टेसनमा पेट्रोल पम्पमा जस्तो मान्छे बसेर सेवा दिइरहनु नपर्ने प्राधिकरण बताउँछ । 

प्राधिकरणका अनुसार कति मिनेटसम्म चार्ज गर्ने हो त्यो बराबरको रुपैयाँ काटिन्छ, त्यो पनि विद्युतीय भुक्तानी हुनेछ । 

समय वा पैसा बराबरको चार्ज पूरा भएपछि गाडी थप चार्ज हुँदैन । ५० वटै स्टेसनको कन्ट्रोल काठमाडौंबाट नै गरिनेछ । 

कहाँ–कहाँ हुन्छ चार्जिङ स्टेसन ? 

नेपाल विद्युत् प्राधिकरणले दिएको जानकारी अनुसार, काठमाडौं उपत्यकाको विभिन्न ७ ठाउँमा चार्जिङ स्टेसन राखिनेछन् ।

जसअन्तर्गत सिंहदरबार, बबरमहल, प्रदर्शनीमार्ग, बुढानीलकण्ठ, नयाँ बसपार्क, पुरानो बसपार्क लगायतका स्थानमा चार्जिङ स्टेसन हुनेछन् ।

प्रदेश नम्बर १ को ५ ठाउँमा चार्जिङ स्टेसन हुनेछ । जसअन्तर्गत झापा जिल्लाको दमक, भद्रपुर, कन्काई, मोरङको विराटनगर, सुनसरीको इटहरीमा चार्जिङ स्टेसन रहनेछन् । 

यस्तै प्रदेश २ को ७ ठाउँमा चार्जिङ स्टेसन रहनेछ । जसअन्तर्गत पर्साको वीरगञ्ज, बाराको सिमरा, रौतहटको चन्द्रनिगाहापुर, धनुषाको ढल्केवर, धनुषाको जनकपुरधाम, महोत्तरीको बर्दिबास र सप्तरीको राजविराजमा चार्जिङ स्टेसन बनाइनेछ ।

यस्तै बाग्मती प्रदेशअन्तर्गत धादिङको मलेखु, सिन्धुलीको बीपी राजमार्ग, मकवानपुरको हेटौंडा, चितवनको भरतपुर, चितवनको कुरिनटार–मुग्लिन सडक र काभ्रेको बनेपामा चार्जिङ स्टेसन रहनेछ ।

प्राधिकरणका अनुसार, गण्डकी प्रदेशमा ६ ठाउँमा चार्जिङ स्टेसन रहनेछ । 

जसअन्तर्गत नवलपरासी पश्चिमको नवलपुर, तनहुँको दमौली, स्याङ्जाको स्याङ्जा बजार र कास्कीको पोखरामा चार्जिङ स्टेसन रहनेछ । 

यस्तै लुम्बिनी प्रदेशको ८ ठाउँमा विद्युतीय सवारी साधनका लागि चार्जिङ स्टेसन रहनेछ । 

जसअन्तर्गत बाँकेको नेपालगञ्ज, दाङको भालुवाङ, दाङको दाङ बजार, रुपन्देहीको बुटवलका ३ स्थान, पश्चिम नवलपरासीको बर्दघाट/सुनवलमा रहनेछ । 

यस्तै कर्णाली प्रदेशको सुर्खेतमा चार्जिङ स्टेसन रहनेछ । 

यता प्रदेश ७ मा कञ्चनपुरको महेन्द्रनगर, कैलालीको धनगढी, डडेल्धुराको डडेल्धुरामा चार्जिङ स्टेसन रहनेछ ।