महिला लिग फूटबलमा आज आर्मी र पुलिस भिड्ने

प्रतिकात्मक तस्वीर

राष्ट्रिय महिला लिग फूटबल आज बुधवारदेखि शुरू हुँदैछ ।

अखिल नेपाल फूटबल संघ (एन्फा) को आयोजनामा त्रिपुरेश्वरस्थित दशरथ रंगशालामा बुधवार विभागीय टोली त्रिभुवन आर्मी क्लब र नेपाल पुलिस क्लब भिड्ने छन् ।


Advertisement

उद्घाटन खेल दिउँसो २ बजे शुरू हुनेछ । पहिलोपटक बृहत् रूपमा आयोजना गर्न लागिएको महिला लिगको उद्घाटन खेलमा दर्शकलाई निःशुल्क प्रवेशको व्यवस्था गरिएको एन्फा प्रवक्ता किरण राईले जानकारी दिए ।

उद्घाटनपछिका खेल भने एन्फा मैदान सातदोबाटोमा हुनेछन् । पहिलोपटक डबल राउन्ड रोबिनको आधारमा आयोजना हुन लागेको महिला लिगमा ७ टोली सहभागी छन् ।


Advertisement

एपीएफ क्लब, नेपाल पुलिस क्लब, त्रिभुवन आर्मी फुटबल क्लब, चौदण्डीगढी नगरपालिका, वालिङ नगरपालिका, चन्द्रपुर नगरपालिका र विराटनगर महानगरपालिकाले उपाधिका लागि प्रतिस्पर्धा गर्नेछन् । 

महिला लिग पहिलोपटक राउन्ड रोबिनको आधारमा हुन लागेको हो । पाँचौं संस्करणको महिला साफ च्याम्पियनसिप विराटनगरमा सफलतापूर्वक सम्पन्न गरेको एन्फाले कोरोनाकै कारण महिला लिगको आयोजना गर्न पाएको थिएन ।

यसपटकको महिला लिगमा सहभागी टोलीले ४ विदेशी खेलाडी समेत राख्न पाउने छन् । प्रतियोगिताको विजेता टोलीले १० लाख रुपैयाँ, दोस्रोले ८ लाख रुपैयाँ, तेस्रोले ५ लाख रुपैयाँ तथा चौथो हुनेले ३ लाख रुपैयाँ प्राप्त गर्ने एन्फाले जनाएको छ ।

प्रतियोगिताको सर्वोत्कृष्ट खेलाडीले १ थान स्कुटर तथा विधागत उत्कृष्ट खेलाडीले जनही ५० हजार रुपैयाँ पुरस्कार प्राप्त गर्नेछन् ।

कमेन्ट गर्नुहोस्