नारी दिवसका अवसरमा तनहुँको देवघाट गाउँपालिकाले पत्नीले पति बोकेर दौडिने प्रतियोगिता आयोजना गर्ने भएको छ ।

१११ नारी दिवसका अवसरमा गाउँपालिकाले यही फागुन २४ गते दौड प्रतियोगिता गर्न लागेको हो । 

देवघाट–५ स्थित कालिका माध्यमिक विद्यालयमा प्रतियोगिता आयोजना हुनेछ । दौड १०० मिटरको हुने गाउँपालिकाका अध्यक्ष दुर्गबहादुर थापाले जानकारी दिए ।

गाउँपालिकाले नारी दिवसका अवसरमा विविध कार्यक्रम आयोजना गर्दैछ । त्यसमध्ये पति बोकेर दौडिने प्रतियोगिता नयाँखाले कार्यक्रम हो ।

तनहुँ जिल्लामा यसअघि केही वर्ष पहिले क्षेत्रीय होटल संघ तनहुँले दमौलीमा पतिले पत्नी बोक्ने प्रतियोगिता आयोजना गरेको थियो ।

गाउँपालिकाले नारी दिवसका अवसरमा दिवा खाजा व्यवस्थापनका लागि विद्यालय र बाल विकास केन्द्रलाई भाँडाबर्तन वितरण तथा ढोरबाराही डेन्टल केयर सेन्टरको सहयोगमा महिला स्वस्थ दाँत प्रतियोगिता एवं दन्त शिविर समेत आयोजना गर्दैछ ।