चैत्र शुक्ल अष्टमीमा मनाइने चैते दशैंका अवसरमा उपत्यकाका शक्तिपीठमा कोरोना जोखिमबाट बच्न भौतिक दूरी कायम राखी भक्तजनलाई दर्शन गराइएको छ । 

कोरोना जोखिम नभएको बेलाजस्तो भक्तजन मन्दिरमा गएका छैनन् । गएका भक्तजन पनि मास्क लगाइ भौतिक दूरी कायम गरेर दर्शन गर्ने बित्तिकै फर्कने गरेका छन् ।

उपत्यकाको प्रमुख शक्तिपीठ गुह्येश्वरीमा २ वर्षअघिको चैते दशैंमा जस्तो भक्तजनको भीड नलागेको मन्दिर व्यवस्थापन समितिका अध्यक्ष सुमित खड्गीले जानकारी दिए ।

गत वर्षको चैते दशैंमा भने कोरोनाबाट बच्न बन्दाबन्दी जारी गरिएकाले भक्तजनलाई दर्शन गर्न दिइएको थिएन । नित्यपूजा, बलिपूजा, कालरात्रिपूजा लगायत विधि भने गत वर्ष पनि पूरा गरिएको थियो ।

आएका भक्तजनलाई दूरी कायम गरी सहजरूपमा दर्शन गराएर फर्काइएको उनले सुनाए । चैत्र शुक्ल अष्टमीका अवसरमा गरिने पूजा विधि भने मन्दिरमा पूरा गरिएको छ । बेलुकी गुठी संस्थानले कालरात्रि पूजासहित पञ्चबलि दिएर तान्त्रिक विधि पूरा गर्ने समितिले जनाइएको छ । यसको व्यवस्थापन संस्थानले नै गर्ने गरेको छ ।

उपत्यकाको पनि मुख्य शहर बाहिरका ग्रामीण भेगमा रहेका शक्तिपीठमा भने बढी भक्तजन दर्शनका लागि गएका छन् । गोकर्णेश्वर नगरपालिका–१ स्थित शिवपुरी नागार्जुन राष्ट्रिृय निकुञ्ज क्षेत्रमा रहेको सुन्दरीमाई मन्दिरमा भने विगत वर्षमा जस्तै भक्तजन गएका छन् । अलि टाढाबाट आउने भक्तजन नआएपनि नजिकका प्रायः भक्तजन चैत्र शुक्ल पक्षको नवरात्रमा मन्दिर दर्शन गर्न आएको मन्दिर व्यवस्थापन समितिका सदस्य सुशील सिम्खडाले जानकारी दिए ।

रमणीय स्थलमा भएको मन्दिर भएकाले पनि यहाँ भक्तजनको भीड लाग्ने गरेको छ ।

गोकर्णेश्वर नगरपालिका–५ मै रहेको चामुण्डा मन्दिरमा पनि भक्तजनले भौतिक दूरी कायम गरेर दर्शन गरेका छन् । प्रत्येक वर्ष चैत्र शुक्ल अष्टमीका दिन गोकर्णेश्वर नगरक्षेत्र र काठमाडौं महानगरपालिका–६ स्थित बौद्ध क्षेत्रमा चामुण्डा रथयात्रा गरिन्छ ।

सरकारले जारी गरेको स्वास्थ्य मापदण्ड बमोजिम रथयात्रा चलाउन मंगलवार बिहान मन्दिर व्यवस्थापन समिति, वडा कार्यालय र महानगरीय प्रहरी वृत्त बौद्धले बैठक गरी दिउँसो १ बजेदेखि रथयात्रा चलाउने निर्णय गरेको वडाध्यक्ष नारायणबहादुर सुवेदीले जानकारी दिए । रथयात्रामा दूरी कायम गराउन प्रहरी र स्वयंसेवक समेत परिचालन गरिने छ ।