नेकपा एमालेको नयाँ नेतृत्व चयनका लागि दशौं महाधिवेशनको बन्दशत्र शुरू हुन लागेको छ । 

शनिवार बिहान १० बजे नै शुरू हुने भनिएको बन्दशत्र दिउँसो २ बजेपछि शुरू गर्ने तरखर छ । 

अधिकांंश महाधिवेशन प्रतिनिधि हलभित्र प्रवेश गरिसके पनि अध्यक्ष केपी शर्मा ओली हलमा आएका छैनन् । बन्दशत्र चलिरहेको होटलमा ओली उपस्थित भएका छन् । 

बन्दशत्र शुरू नभएपछि प्रतिनिधिले विद्युतीय मतदानबारे जानकारी लिन खोजेका थिए । त्यहाँ उपस्थित पूर्व पोलिटव्युरो सदस्य एवं प्रदेश १ का पूर्व मुख्यमन्त्री शेरधन राईले चुनाव नहुने बताए । 

‘चुनाव हुने कुनै चान्स छैन,’ राइले भने । नेतृत्वमा सहमतिको प्रयास स्वरुप पदाधिकारीको संख्या बढाउने निर्णय शुक्रवार भएको थियो । अध्यक्षमा उम्मेदवारी दिने बताएका भीम रावलले भने मनोनयन दर्ता गर्ने बताएका छन् । 

‘अध्यक्षको उम्मेदवारी दिन्छु, प्रतिनिधिसँग कुरा गरिरहेको छु, प्रत्येकलाई चिन्छु । विधि पद्धतिमा विश्वास गर्ने सबैले मलाई समर्थन गर्नुहुन्छ’ रावलले भने । 

शुक्रवार शुरू भएको एमालेको दशौं महाधिवेशन नयाँ नेतृत्व चयन गर्दै भोलि सम्पन्न गर्ने तयारी छ ।